ستاندەر
دوای ئەوەی ڕۆژی چوارشەممەی ڕابردوو لیژنە ۱۳ کەسیەکەی بزوتنەوەی گۆڕان کە بۆ یەکلاییکردنەوەی سی ڤی بەربژێرەکانی گۆڕان بۆ پۆستی ئەو وەزارەتانەی گۆڕان وەریگرتووە کارەکانی کۆتایی پێهێنا و شۆڕلیستی کاندیدەکانی کرد، سەرچاوەیەکی باڵا لە گۆڕان بە ستاندەری ڕاگەیاند ئەنجامی کاری لیژنەکە ناڕەزایی بەشێکی سەرکردە و کەسە کاریگەرەکانی ناو گۆڕانی لێکەوتۆتەوە، بەجۆرێک داوا دەکەن گۆڕانکاری لەو لیستە بکرێت و هەندێک لەو کەسانەی کە لە ئەوان نزیکن و لیژنەکە ناویانی شۆڕت لیست نەکردووە بخرێنە ناو لیستەکە بۆ ئەوەی جڤاتی نیشتیمانی دەنگیان لەسەر بدات.
هەمان سەرچاوە وتیشی ئێستا گۆڕان لەبەردەم دوو ڕیانێکی یەکلاکەرەوەیە ئەویش ڕێزگرتنە لە بڕیاری دامەزراوەیی و کاری لیژنە هەڵبژێردراوەکە یاخود هاوشێوەی یەکێتی و پارتی خەڵک بە تەزکیە و بڕیاری تاکە کەسی بسەپێندرێت، وتیشی ئەو هەنگاوەی لیژنەکەی گۆڕان دەریخست ئەوەی دەگۆترێت گۆڕان لەلایەن چەند کەسێکە کۆنتڕۆلکراوە دەرکەوت بەو شێوەیە نیە چونکە لیژنەکە بە سەربەخۆییانە کارەکانی تەوا و کرد.
جێی باسە گرنگترین ئەو کەسانەی کە سی ڤیان پڕ کردبویەوە و ناویان لە شۆڕت لیستەکە نیە ئەمانەن کوێستان محەمەد ـ سەرۆکی فراکسیۆنس گۆڕان لەخولی سێیەمی پەرلەمان و ئەندامی جڤاتی گشتی کە دەگۆترا ناوی ئەو بۆ وەزیری کار یەکلابۆتەوە، زمناکۆ جەلال ڕێکخەری ژوری هەڵبژاردن، برزۆ مەجید سەرۆکی فراکسیۆنی گۆڕان لە خولی چوارەمی پەرلەمان.