ستاندەر
بەڕێوبەری گشتی ئەوقافی سلێمانی ڕایگەیاند لەهەوڵداین بۆ ئەوەی بۆ هەینی داهاتوو دەرگای سەرجەم مزگەوتەکانی کوردستان بەڕوی نوێژخوێناندا بکرێنەوە، بەڵام ئەگەر ئەنجومەنی وەزیران بڕیاری کردنەوەی مزگەوتەکانی نەدا ئەوە بە هەماهەنگی لەگەڵ پارێزگاری سلێمانی و ژوری ئۆپراسیۆنەکانی پارێزگای سلێمانی بڕیاری کردنەوەی مزگەوتەکانی پارێزگای سلێمانی دەدەین.
هەروەها گوتی فشارێکی زۆر لەسەر مامۆستایانی ئاینی و بەڕێوبەرایەتی ئەوقاف هەیە، بۆیە پێویستە بەر لەوەی لەدەستی ئەنجومەنی وەزیران دەربچێت و مزگەوتەکان بکرێنەوە ئەنجومەنی وەزیران خۆی بڕیاری کردنەوەی مزگەوتەکان بدات، چونکە ئێستا لە زۆرێک لە شوێنەکان بەبێ گوێدانە بڕیاری داخستنی مزگەوتەکان مزگەوتەکان کراونەتەوە، یاخود لەدەرەوەی مزگەوتەکان خەڵک کۆدەبێتەوە بۆ نوێژ. ناوبراو گوتیشی بڕیاری کردنەوەی مزگەوتەکان کردنەوەی سەرجەم مزگەوتەکانی پارێزگای سلێمانی دەگرێتەوە.