ستاندەر
بەھرۆز گەڵاڵی نوێنەری یەکێتیی نیشتمانی کوردستان لە تورکیا لە چاوپێکەوتنێکدا کە لە ژمارەی ئەمڕۆ چوار شەممەی رۆژنامەی “ئاژانس”دا بڵاوکراوەتەوە، رایگەیاندووە “ئەوەی بڵێت تورکیا پاڵپشتی ریفراندۆمی ھەرێمی کوردستان دەکات، لەگەڵ خۆی و میللەتەکەشی راستگۆ نییە و ھیچیش لە سیاسەتی تورکیا دەربارەی کورد تێنەگەیشتوە”.
ناوبراو سەردانی ئەمدواییەی شاندی ئەنجومەنی باڵای ریفراندۆمی بۆ برۆکسل بە سەرۆکایەتی “مەسعود بارزانی” بە “فاشیل” ناوبردووە و ئاماژەی بەوەکردووە “دەرکەوت دیپلۆماسییەتی حکومەتی ھەرێم زۆر لاوازە لەبارەی ریفراندۆمەوە”.
لە بەشێکی دیکەی چاوپێکەوتنەکەدا نوێنەری یەکێتیی نیشتمانی کوردستان پێشبینی ئەوەی کردووە “ریفراندۆم ئەنجام نەدرێت” و جەختیشی کردووەتەوە “ھیچ گرەنتییەک لە تورکیا وەرنەگیراوە سەبارەت بە پرسی ریفراندۆم”.