حەقیقەتەکانی پشت ڕیفراندۆم!

لەلایەن ستاندار Posted on 631 جار بینراوە

رزگار مستەفا

تا ئەم کاتەش کەتەنها ماوەیەکی کەمی ماوە بۆ ئەنجامدانی ڕیفراندۆمی باشوری کوردستان، ئەگەرەکانی ئەنجامنەدان و دواخستنی لەئەگەرەکانی ئەنجامدانی، ئەگەر بەهێزترنەبن، لاوازترنین، لەگەل ئەوەشدا چەند راستییەکی بۆ باشورییەکان خستەروو، کەپێویستن بۆ شەقام.

١- ژیان یان ئابورییەکەی باشور!؟
پرسی ڕیفراندۆم بابەتێکی گەرمی گۆرەپانی سیاسی باشورو ولاتانی دەوروبەرو جیهانیشە، ئەمەش ڕەنگە ئەوە نەگەیەنێت کە باشوری کوردستان ئەوەندە گرنگ بێت بۆ کۆمەلگای نێودەلەتی و ناوچەکە، ئەوەندەی سەلمێنەری ئەوەیە کە رۆژهەلاتی ناوەڕاست شوێنی بەدەستهێنانی بەرژەوەندی ئابوری و چەسپاسندنی ئیرادەی سیاسی ولاتانی زلهێزی دونیایە، باشوری کوردستانیش لەونێوەندەدا شوێنی بەدەستهێنانی بەرژەوەندی سیاسی و ئابوری ولاتانی جیهانی و هەرێمییە.

٢- خوێندەواری یان خەڵەفاوی!؟
دەرکەوت هەرچی رۆشنبیرو خوێندەواری باشورە، بەدەگمەن نەبێت بیرکردنەوەیان جیاواز نییە لەنوخبەی سیاسی و دەسەلات، بۆبابەتێکی گرنگی وەک ڕیفراندۆم و دروستکردنی دەولەت، گریمان بابەتی ڕیفراندۆم بابەتێکی نیشتیمانییەو بۆ تێڕوانینی جیاواز نابێت، ئەوە ئاساییە، بەلام ئەوەی ئاسایی نییە! ئەو بە دێوەزمەکردن و دیکتاتۆری کردنەی کە دەسەلات و حیزبەکانیان بە شەقام دەناساند! ئەوە جێگای نیگەرانییەکی قولە! ئایا ئەمە حەقیقەتی دەسەلاتی کوردییە یانیش سەلمێنەری دابەشبوونی نوخبەی خوێندەوارە بەسەر هێزەکەنی باشوردا، کە هەرکاتەو با ئاوازی ئەولایەنە خوێندیانە کەبەرژەوەندی ئابوری و سیاسییان تێیدا مسۆگەربووە!

٣- سیاسەت یان بازرگانیکردن!؟
لەدوای پڕۆسەی ئازادی عێڕاقەوە کورد بەشدارییەکی گەورەی هەبووە لەحکومەتە یەک لەدوای یەکەکانی عێڕاقدا، کەلە ئاستی جێگری سەرۆکی حکومەت و سەرۆک کۆمارو وەزیرو…هتد خۆی بینیوەتەوە، دەکرا لەوماوە درێژەدا سەرجەم ئەم پۆستانە بەمەبەستی گفتوگۆی جددی بەکارهاتبان، لەسەر چارەسەری کێشەکانی نێوان هەرێم و حکومەتی ناوەدیدا، بەلام جێی داخە ئەودۆخەی هاتۆتەپێش ئەوەمان پێدەلێت، کەلەشوێن ئەمەی سەرەوە، کورد سیاسەتی ڕۆژی کردووەو لەهەوڵی بەدەستهێنانی پۆستی زیاترو بەرژەوەندی ئابوری و جێخۆشکردنی زیاتربووە لەحکومەتی ناوەندیدا، هەربۆیە لەدۆخێکی وەهادا کەپرسی ڕیفراندۆم و دروستکردنی دەولەت دێتەپێشەوە، هیچ کام لەسیاسییەکانی عێڕاق نەبڕوا بە بیرۆکەی جیابوونەوە دەکەن و نە بەڕەوای ئەو نوخبە سیاسییەی باشوری دەزانن ببنە خاوەنی ئەو سەروەرییە، وەئەوپەڕی دژایەتی دەکەن تا ئاستی بەکارهێنانی هێزی سەربازی!

٤- پاڵپشت یان پاسپۆرتی ئەوروپی!؟
بەدرێژایی چارەگەسەدەی دەسەلاتی کوردی لەباشوردا، سەرجەم کایەکانی ژیان لەنێوان حیزبی دەسەلاتداردا دابەشکراوە، بەگوێرەی بەدەستهێنانی دەنگی شەقام کەزۆرجار ڕەچاوی ئەمەش نەکراوا! لەمڕووەوە بابەتی نوێنەرایەتییەکانی حکومەتی هەرێم لەنێوان حیزبەکاندا دابەشکراون، ئەم نوێنەرایاتییانە ئەوەندەی سیاسەتو ئەجندای ڕاستەقینەی حیزبەکانیان جێبەجێکردووە و لەهەوڵی خزمەتی ئەندامو لایەنگرانیاندا بەکاریان هێناوە، ئەوەندە بابەتەکانی نەتەوەیی و بردنە پێشی پەیوەندی دیبلۆماسی کورد لەگەل ولاتانی دونیادا، وە ئاشناکردنی دوونیا بە نەهامەتی و کێشەکانی دێرینی کورد ئەجندای کارەکانیان نەبووە، نەبوونی هیچ پالپشتییەکی ئەوروپی و کۆمەلگای نێودەوڵەتی، لەدۆخی ورووژاندنی بابەتێکی گرنگی وەک ڕیفراندۆمدا، کەتاکە وشەیەکی خێر بۆکورد لەوانەیە ئارامییەکی گەورەی شەقامی لێبکەوێتەوە، جێگای نیگەرانییەکی قوڵەو سەلمێنەری ئەو ڕاستییەیە کە نوێنەرایەتییەکانی باشور لەوڵاتاندا نوێنەری حیزب و بەرژەوەندییەکانی بوون، لەئاست گەورەیی کێشەی کورددا نەبوون و فەشەلیانهێناوە لەبەدەستهێنانی پاڵپشتی نێودەوڵەتیدا!

٥-جورئەتی سیاسی!
دووای بڕیاردانی پڕۆسەی ڕیفراندۆم، زۆرێک لەهاوڵاتیان بەبەڵێ و زۆرێکیش بەنەخێر گوزارشتیانلەبۆچوونیانکرد، ئەوەئاساییە تاڕاددەیەک! بەڵام ئەوەی جێگای نیگەرانی و ڕخنەی قوڵی شەقامە، لەدووحیزبی دەسەڵات و ئۆپۆزسیۆنی خولی ڕابردووی حکومەت( گۆڕان، کۆمەڵ )، کەتائەو ساتەوەختەش ڕووئیایەکی ڕوونیان نییە لەسەر پڕۆسەکە، ئەمەش دەلالەتی نەبوونی جورئەتی سیاسی ئەم دوولایەنەیە لەبەرامبەر ئەوپڕۆسە سیاسییە نیشتیماییەدا، چ بەوەی ببنە بەشێک لەپڕۆسەکەو کاری بۆبکەن، یانیش بەپێچەوانەوە!
لەبەرامبەردا قەوارەیەکی تازەی ناڕازی لەژێرناوی ( جوڵانەوەی نەخێر لەئێستادا ) بەسەرۆکایەتی (شاسوار عبدالواحید ) دامەزرا، کەڕابەرایەتی بەرەی نەخێر دەکات و دژی بەرەی بەڵێیە، ئەمەش شتێکی تازەی گۆڕەپانی سیاسی باشورە، بەشێک بەهەڵوێست و جەرائەت و بەشێکیش بەخیانەتی نیشتیمانی ناوی دەبەن، بۆ یەکلابوونەوەی ئەمەش، دەبێت چاوەڕێی کات بین!

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.