عەبدولحەکیم زراری
دواجار مادام حزبە سیاسییەکان گەمەی سیاسی دەکەن لەسەر گۆڕەپانی سیاسیدا، کەواتە شتێکی زۆر چاوەڕوان کراو و نۆڕمال دەبێت کە لەو گەمەیەدا شکست و کەوتن تووشی ھەر لایەنێکی سەرەکی گەمەکەرە سیاسییەکە بێت، بۆیە پێویستە ھەر لەسەرەتاوە لایەنە سیاسییەکانی ئەو گەمە سیاسییە بەر لەوەی خەریکی راھێنانی چۆنییەتی گەمەکردنی سیاسی و داڕشتنی پلان و نەخشە و تەکنیکی یارییە بکەن، پێویستە خۆیان لەسەر ئەوە رابھێنن کە چۆن بە گیانێکی وەرزشییانە ئەو دۆڕانە قبوڵ دەکەن کە لە ململانێ سیاسیەکەدا دووچاری دەبن، چونکە ئەگەر لەسەر ئەو راھێنانە خۆیان رانەھێنن و کاری لەسەر نەکەن، ئەوا گومانی تێدانییە کاردانەوەی خراپی لێ سەوز دەبێ و لە دواجاردا دەبێتە گرێیەکی دەرووونی و بەردەوام لە خەم و ھەڵپەی تۆڵەسەندنەوەی نامەشروع و تووش بوون بە رەفتارنوواندنی پێچەوانەی ھەموو رێساکانی یاریکردن دەبن . بەداخەوە ئەوەی لەم دواییە لە ھەرێمی کوردستان روویدا کە بووە ھۆی لە دەستدانی رووبەرێکی فراوان لە خاکی ھەرێمی کوردستان و ئاوارەبوونی ھەزاران کەس، دیارە لەبەرەنجامی ئەو سیاسەتی گەمە کردنە بوو کە لایەنە سەرەکییە سیاسییەکانی یاریەکە لە ھەرێمی کوردستان گرتبوویانەبەر، بۆیە پێویستە سەرکردەی گەمەکەرەکان بەرلەوەی رەخنە و گلەیی ئاراستەی ئەم و ئەو بکەن و یەکتری تاوانبار بکەن پێوستە بە خۆداچوونەوە و سەرکۆنە کردنی خۆیان بکەنە ئەولەوییەتی بەرنامەی کاری داھاتوویان، و ھەڵوەستەیەکی جیددی لەسەر ئەو ئەجیندا سیاسییەیان بکەن کە کاریان بۆ کردووە و قەناعەتی خۆیانیانی لەسەر ھەڵچنیوە، ئەوەی لە ھەمووشی گرنگترە ئەو شکستە سەربازی وسیاسییەی کە لەبەرەنجامی ئەو گەمە سیاسییەی لەسەر دەستی ئەوان روویداوە، بێ دوودڵی و بە رۆحێکی وەرزشییانە دانی پێدا بنێن و خالی لاواز و نەپێکانی ئەو ئامانجەی کە ھەوڵیان بۆ دابوو دەستنیشانی بکەن. لەلایەکی تریشەوە جەماوەری ئەو لایەنانەش پێویستە ئەم شکستە و شوێنەوارەکانی ھەرس بکەن و بە گیانێکی وەرزشی وەری بگرن بە جۆرێک خۆیان بە دوور بگرن لە ھەر رەفتار و کاردانەوەیەکی نەرێیانە کە ببێتە ھۆی تێکچوونی ئاشتەوایی کۆمەڵایەتی و یەکڕیزی لایەنە سیاسییەکان.
ھەمدیس شتێکی زۆر نۆڕمالیشە لە پەراوێزی ئەو شکستە سیاسی و سەربازییەی کە تووشی ھەر لایەنێکی سیاسی دەبێت، کە بەپلەی یەکەم کەسی یەکەمی ئەو گەمەیە لێی بەرپرسیارە، ج بەخۆی بە تەنھا یان تەواوی ستافەکەی واز لەم سەرپەرشتی کردنی یاریە بھێنن و دە‌ست لەکار بکێشنەوە تا کەسانی تر بە تین و توانای تر و ئەجێندای تازەوە بێنە پێشەوە و ئەو شکستە لە داھاتوودا بە سەرکەوتنێکی گەورە بگۆڕنەوە و جارێکی تر ھیوا و ئۆمێد بۆ ھەوادارانیان بگەڕێننەوە. بەلێ ئەمە سروشت و گەوھەری راستەقینەی گەمەی سیاسییە چونکە مەرج نییە بەردەوام لەو ململانێیە سیاسییەدا براوە بیت و دەستەکەوتە سیاسییەکان بۆ ھەمیشە بۆ خۆت بچنییەوە، بەڵکو جاری وا ھەیە پێچەوانەوە دەکەوێتەوە، و ئەوەی دەستت کەوتووە لە یارییەکانی پێشوودا لە یارییەکی تردا لەدەستی بدەی و بگرە لەسەریشی قەرزدار ببیەوە، چونکە دواجار لایەنە سیاسییەکان لەگەمەیەکی سیاسی بەردەوامدان، گرنگ ئەوەیە چۆن وانە لەم شکستە وەردەگری و بە گیانێکی وەزشییانە بەرخوردی لەگەڵ دەکەی، نەک خوانەخواستە لە دەرھاوێشتەی ئەم شکستەدا تووشی ھستریا بی و وابزانی کۆتایی مێژووە و کاردانەوەی خراپ بنوێنیت، دیسان دەیڵێمەوە کە ھەر عەقڵەو لە خەسارەتێکدایە بۆیە دەبێ لە مەودوا ئەو گوتەیە بکەین بە بنەماو خاڵی دەستپێک بۆ بەخۆداچوونەوە و سەرلەنوێ دەستکردنەوە بە گەمە سیاسیییەکە.
قبوڵکردنی شکست لە گەمەی سیاسیدا گیانی وەرزشی دەوێت
