عەبدولحەکیم زراری
لە سەروبەندی ھەڵمەتەکانی پڕۆسەی ریفراندۆم بۆ دەوڵەتی سەربەخۆیی کوردستان، پێنووس بەدەستانێکی زۆر ئەوانەی بە گوتاری حەماسی سەربەخۆیی پف درابوون،و بە حیساب خۆیان بە خەمخۆری ئایندەی گەلی کوردستان دەزانی و لە ھەڵپەی دروست بوونی دەوڵەتی کوردستان بوون، سەری زمان و نووکی قەڵەمیان تەنھا ئەو رستەیە بوو کە بەردەوام لەسەر زاریان بەردەبۆوە و لە ھەناوی پێنووسەکەیان دەھاتەدەر و گوێچکە و زیھنی خوێنەرانیان پێ دەئاخنی تا راددەی کاس کردنیان، ئەویش بریتی بوو لەوەی کە بەلێ ئێمە دەزانین گەندەڵی و پیسخۆری و ناشەفافییەت و دزی و گزی و نا دادپەروەری و سەروەر نەبوونی یاسا و ئیفلیجی لە ئیدارەدانی ھەرێم و بە دامەزراوەیی نەکردنی سێکتەرەکانی حوکمڕانی و چەندان کێماسی تر بەرۆکی ئەم حکومەتەی گرتووە و بوونیان ھەیە، بەڵام لەبەر ئەوەی پڕۆژەی دامەزراندنی دەوڵەتی سەربەخۆییمان لە پێشە و لە ھەوڵی بە ئاکام گەیاندنین کە ئاواتی لە مێژینەی سەدان ساڵەی میللەتی کوردە، و بەو بۆنەیەشەوە رووبارێک خوێن و فرمێسکی بۆ رژاوە، بۆیە پێویستە لە پێناو ئەو پڕۆە پیرۆز و مەزنە و ئەو خەونە گەورەیەی تاکی کورد جارێ با ئەو ئاریشە و قەیرانانە سڕ بکەین و زیاتر فۆکەسمان بخەینەسەر ھێنانەدی خەونی دەوڵەتی کوردستان، چونکە ئەگەر دەوڵەتەکەمان دروست کرد ئەوا ئۆتۆماتیکی ھەموو ئەو کەموکوڕییەی کە حکومەتی ھەرێم ھەیەتی و شکستی ھێناوە لە پێشکەشکردنی نموونەیەکی جوانی دامەزراوەیی و دیموکراسی و پێشکەشکردنی خزمەتگوزرای و بەرقەرار کردنی پرەنسیپەکانی مافی مرۆڤ، ئەوا گومانی تێدانییە لە چوارچێوەیەی ئەو دەوڵەتە تازەیەی کە دروستی دەکەین ھەموو ئەو دەردانەی کە ئاماژەمان پێدان، دەبنە بڵقی سەرئاو و بە (کن فیکن)ێک ھەمووی چارەسەر دەبێ و دونیا دەبێتە شامی شەریف !!!. ئەمەش ھەمووی بە پاساو و ھەنجەتی ئەوەبوو کە ئەم خەڵکە بە ھۆی ئەو قەیرانە چارەسەر نەکراوانەی ھەن، لە دەنگدان بە بەلێ ساردنەبنەوە و پاشەکشەی لێ نەکەن، بەڵکو بەپێچەوانەوە بەگەرم و گوڕی و حەماسەتەوە بەرەو سندوقی دەنگدان ھەنگاو بنێن و ئەو رۆژە بکەنە کەرنەڤاڵی سەربەخۆیی. بەڵام بەداخەوە ئەوەی کە لە ١٦ی ئۆکتۆبەر روویدا جا لە ژێر ھەر تایتل و بە ھەر ھۆکار و پاساوێک بێت من قسەم لەسەر ئەوە نییە و ئەو مافەش بەخۆم نادەم کە تۆمەت و خیانەت بۆ ھیچ کەس و لایەنێک ببەخشمەوە، بەڵکو ئەمە باسێکی ترە و پێویستی بە لێکۆلینەوە و بەدواداچوونی جیددی و زیاتر ھەیە، تەنھا ئەوە دەلێم کە ئەو خەون و خۆزگە و خەیاڵ و ختووکەی ھەمان بوو بۆ دەوڵەتی سەربەخۆیی بە داخەوە ھەمووی بەچەند کاتژمێرێک رمێنرا و بوون بە بڵقی سەرئاو، جا دوا بە دوای ئەو رووداوە کارەستبارەی کە بەسەر گەلەکەماندا ھات کە نیوەی زیاتری خاک و خەڵکی ھەرێمەکان لەدەستدا، ئیتر لەمەودوا ھیچ شتێک نامینێتەوە کە ناوی دەوڵەتی کوردستانی بێت تەنھا دەبێ لە بیری ئەوە بین ئەو نیوەی لە ھەرێمەکەمان ماوە لە دەستی نەدەین و بیپارێزین، تا ئەو رۆژەی دێت کە ناشزانین دوورە یان نزیک کە زەمینە و زەمانێک دێتە پێش بتوانین جارێکی تر بە شێواز و فۆرمێکی تر ھەنگاو بۆ سەربەخۆیی بنێین و تێی ھەڵچینەوە. بەھەر حاڵ ئەوەی مەبەستمە بیڵێم ئەوەیە کە حکومەتی ھەرێم لەم دواییانە بە فەرمی ئەنجامدانی ریفراندۆمی سڕ کرد و دادگای باڵای فیدراڵی عێراقیش بڕیاری نادەستووری بوونی ریفراندۆمەکەیدا و کار بە ئەنجامەکانی ناکات، بەمەش چەند فەرسەخێکی تر لە دەوڵەتی کوردستانی دوورکەوتینەتەوە، لێرەدا رووی پرسیارم لەو نوخبە رۆشنبیر و پێنووس بەدەستانەنەیە کە ھەروەک وتمان ماوەیەک دەستەواژەی دامەزراندنی دەوڵەتی سەربەخۆیی کوردستان لەسەرووی ھەموو شتێکەوەیە دەرخواردی خوێنەرانیان دەدا،و بە پێویستیان دەزانی ھەموو بابەتەکانی تر لە پێناو سەربەخۆیی سڕ بکرێن و دوابخرێن تا ئەو رۆژەی دەوڵەتەکە دادەمەزرێت، ئەرێ نووسەرانی ریفراندۆمی سەربەخۆیی کاتی ئەو نەھاتووە ئەو سڕکردنەی ئیفلیجی دەسەڵات و وێرانی لە سیستمی حوکمڕانی کە ئێوە داواتان دەکرد، شڵبکرێتەوە و بێتەوە سەر سفرە و خوانی باس و خواس و توێژینەوەکردنی؟ چونکە وەکو باسمان کرد حکومەت بەفەرمی ئەنجامی ریفراندۆمی سڕ کردووە و زەربەیەکی گورچکبڕی سرەواندووەتە دەوڵەتە سەربەخۆییەکە، ئایا دەبێ سڕکردنی ئەو ئاریشە و قەیرانانەی کە ھەرێمی کوردستان پێیانەوە دەتلێتەوە و خەڵکی کوردستان بەدەستییەوە دەنالێنن ھەر بە سڕکراوەیی بمێننەوە و وەکو ئەوەی کە کە لەسەردەمی ریفراندۆمدا بە زەروور و پێویستی قۆناغەکەتان دەزانی؟ کە ئەتان وت جارێ بەلایان داناچین و خۆمان لە قەرەی نادەین،و ئەوانە بۆ پۆست دەوڵەت جێ دەھێلین، ئەرێ ئیتر کاتی ئەوە نەھاتووە ئەو پۆلە لە نووسەران تۆزێک جورئەت بدەنە خۆیان کە مادام دەوڵەتەکە جارێ سڕ کراوە و خۆشیان ھێندە بە خەمی نیشتیمان و کوردایەتی و کوردستانیش دەزانن، چاوەرێی چی دەکەن و بۆ ناپڕژێنە سەر باس کردنی جەوھەری کێشەکان و ئەو ھۆکارانەی کە بوونەتە مایەی ھێنانەدی ئەو دۆخە دژوارەی کە بەسەر خەڵکیدا ھاتووە لە ژێر سایە و سێبەری ئەو سیستمە سەقەت و شکست خواردووەی کە دەسەڵاتدارانی ھەرێم لە ماوەی ٢٦ ساڵی حوکمڕانی مومارەسەیان کردووە، تا جارێکی تر میللەتی کورد تووشی ئەو نەگبەتی و نەھامەتی و چەرمەسەرییە نەبێتەوە بەڵکو تا ئەبەد مرۆڤی کورد شکۆ و گەورەیی وەکو ھاووڵاتییەکی رێزلێگیراو بۆ بگەڕێتەوە، ئەمەش دیارە تەنھا و تەنھا لە چوارچێوەی سیستمێکی حوکمڕانی تەندروستدا بەرجەستە دەبێت.
پرسیارێک لە نووسەرانی ریفراندۆم بۆ سەربەخۆیی؟
