هەل ڕەخساوەو كات گونجاوە.. ، چۆن بیگۆڕین؟چۆن چاكی كەین ؟

لەلایەن ستاندار Posted on 435 جار بینراوە

محمد ڕەئوف محمد

لەدوای شەڕی ناوخۆوە خەلكی كوردستان بەدابەشبوویی ڕۆژوو مانگ و ساڵیان ژمارد بەتێپەڕاندنی هەموو كارەسات و مەرگەساتەكانیەوە وخەونی ئازادی و ئارامی وكەرامەتیان سنوورە نەخوازراوەكانی تێپەڕاند تاگەشتە ئەوەی سەدام حسین پێی گوتبووین ( ئیدارەی خەڵك و ووڵات خۆ فشە نیە من بنێشتی كوردیم بیستووە بەڵام حكومەتی كوردیم نەبیستووە ) ئەوزەمانەی ئەو قسەیەمان بیست زۆرمان پێ ناخۆش بوو بۆچی وامانلێهات و وامانكرد بەخۆمان سەدام تانەی وامان لێبدات ، بەڵام ئەفسوس نەمانزانی دوای بیست ساڵیش زۆر خراپتر ئەوقسەیە دووبارە دەبێتەوەو ئەمجارەیان سەدام ئەو تانەوتەشەرەی نەدا بەڵكو هەموو عەرەب و تورك و فارس و جیهان پێیان گوتین … جەماوەرو خەڵكی كورستان بەكادیرو ئەندامی حیزبەكانیشەوە زۆر زیاد لەپێویست سەبرو ئارامی و خۆڕاگریان كردووە بەرامبەر دەسەڵات و حیزبەكان بەئومێدی ئەوەی ئەمجارەنا جارێكی دیكە بەڵكو دۆخەكە وئیدارەو سیاسەتەكە چاك ببێ و چاكیكەن ، بەڵام زۆرهەڵەبووین هەموومان چونكە هەرگیز كێشەو قەیران بە چاوەڕوانی نەك چاك نابێت بەڵكو ئاڵۆزترو چەقبەستووتر دەبێت ..

ئەمڕۆ دوای چواساڵ قەیرانی دارایی قووڵ و كارەساتی پاش ڕیفراندۆم وجارێكی دیكە بەپاڵەوانكردنی عێراق بەدەستی كوردو بێزاری هەموو دونیا لەم فۆڕمە سیاسەتو حوكمڕانی و حیزبایەتیەی لەكوردستان هەیە كاتێكیزۆرگونجاوە بیگۆڕین و چاكیكەینەوە ، ئەم دەسەڵات و سیستەمە بگۆڕین ، ئەم شێوازی حوكمڕانیە سەقەتە بگۆڕین ،ئەم شێوازی دەسەڵات و حوكمڕانیە لەقوتوی هیچ عەتارێكی سیاسەت و بەڕێوەبردندا نیە ،ئەم فۆڕمە لەسیاسەت و دەسەڵات و حیزبایەتی لەبەرئەوەی لە بناغەوە بە نادروست و ناتەندروست هاتووە هەتا بەردەوام بێت و دیوارەكانی بەرزتر بێتەوە خەتەری زیاتر دروست دەكات لەسەر ئەمڕۆو ئایندەی خەڵك بۆیە پێش ئەوەی بڕوخێ پێویستە بەهەموومانەوە بیگۆڕین و چاكیكەینەوە ..

جاران تەنها یەكگرتوو دەیناڵاند بەدەست نادادیەوە دواتر كە ناعەدالەتی پەرەی سەند گۆڕان دروست بوو ، ئەمڕۆ كادیرو ئەندام و جەماوەری یەكێتی و پارتییش بێزارن و ترسی ئەمڕۆو ئایندەیان لێنیشتووە ،و هەر هەمووی خوازیاری گۆڕانكاریەكی ڕیشەییە ، كەواتە كاتەكەی زۆر لەبارو گونجاوەو دەبێت دەست پێبكەین..

چیبكەین و چۆن بكەین ؟؟

پرسیارەكە ڕوو لەو حیزب و هێزو لایەن وقەوارەو كەسایەتیانەیە یان لەدەسەڵات نین یان شەریكی بێدەسڵاتن و لەسەریشیان ماڵە و میللەت سبەی حسابیان لەگەڵ دەكات ، ئەم حیزب و هێزو لایەنانە ڕێكەون لەسەر پرۆژەیەكی حوكمڕانی ڕاشدو دروست و بەهەموویانەوە بەرەیەك پێكبێنن و لەیەك لیستی هاوبەش كۆببنەوەو بەیەكجار بردنەوە مسۆگەركەن ، ئەم هەنگاوە لەبەرئەوەی ئومێدێك بۆخەڵك دروست دەكاتەوە خەڵكیش بەمتمانەوە دەنگی پێ دەداتو پێشوازی لێدەكات ، ئەگەر ئەم حیزبانە ئەم هەنگاوە یان لەم هەنگاوە باشتر نەنێن ئەوە بە ڕاشكاوی بە دەسەڵات دەڵێن بەردوامبن لەسەر دەسەڵات و خەڵكیش بابە داماوی و نەهامەتی و مەرگەساتەكانیەوە بتلێتەوە ، بۆیە ئەمڕۆ زەمینەیەكی سازو گونجاو هاتوەتە كایەوەو مەسئولیتێكی مێژوویی ڕووی كردوەتەهێزەكان و خەڵكی كوردستان هەربێباكیەك قەیرانەكان قوڵترو ئایندە دژوارتر دەكات ..

چارەسەر هەنگاونانی كرداری بەرەو بەرەیەكی فراوان بۆ پێكهێنانی دەسەڵاتی هاوڵاتی و چاكسازی ڕیشەیی و پەڕلەمانێكی ڕاستەقینەو دادگاو قەزایەكی تەواو سەربەخۆ ، ئەم پرۆژەو هەنگاوە بەبێ شەڕی كۆنەقین و گیانی توڵەو پەراوێزخستن ، دەبێت ئەم نیشتمانە بۆهەموان بێت ، نەوت و داهاتەكەی ئابووری و سەروەتی میللەت بێت، دەنگی خەڵك بەهای گۆڕانكاری هەبێت ، بستێك لەم خاكەو بەرمیلێك نەوت و دۆلارێكی تاپۆی كەس نەبێت..هەنگاوی یەكەم بەكشانەوەی هەرسێ لایەنی ئۆپۆزسیۆنی جاران دەستپێدەكات لە حكومەت لەسەر بنەمای ڕێكەوتن لەسەر داهاتوویەكی نوێ بۆ حوكمڕانیەكی تەندروست لەگەڵ هێزەكانی دیكە.

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.