- سۆران عزیز
بەپشت بەستن بەدانراوەکانی گەورە بیرمەندی ئەمریکی، نوام چۆمسکی، حکومەتەکان پشت بەکۆمەڵێک ستراتیژ دەبەستن بۆ درێژەدان بەدەسەڵات و مانەوەیان. لەخوارەوە هەندێک لەو ستراتیژانە باس دەکەین کە حکومەتی هەرێم پیادەیان دەکات بۆ گێلاندنی کۆمەڵگەو پارێزگاریکردن لەمانەوەی خۆیان.
یەکەم/ بەلاڕێدا بردنی ڕای گشتی.
حکومەت بۆئەوەی چاو و سەرنجەکان لەسەر قەیرانە ترسناکەکان لا بدات، هەڵدەستێت بەدروستکردنی کێشەی بچوکتر، لەشێوەی قەیرانی سوتەمەنی، کارەبا، ئاو، موچە بۆ پەردەپۆشکردنی قەیرانی گەورەتر لە دزینی سەروەت و سامانی سەر ئەرز و ژێر ئەرز، تەواوبونی وادەی پەرلەمان و حکومەت، فرۆشتنی نیوەی خاکی هەرێم و دەیان قەیرانی تر.
دووەم/ کێشە و چارەسەری پێشوەخت.
لەکاتی دروستکردنی کێشەی بچوک بۆ پەردەپۆش کردنی قەیرانی گەورەتر، حکومەت چاوەڕوانی کاردانەوەی شەقام دەکات، ئەگەر هیچ دەنگێکی ناڕەزایی بەرزنەبوەوە، ئیتر بەردەوام ئەبێت لەسەر کێشەکە، بەڵام لەگەڵ دروستبونی هەر کاردانەوەیەکی گەورە لەسەر کێشەکە، خێرا حکومەت چارەسەری پێیەو دۆخەکە دەباتەوە باری ئاسایی پێشووی.
سێهەم/ ستراتیژی قۆناغ بەقۆناغ
کاتێک حکومەت دەیەوێت ڕێنمایی، باج یا قەیرانێک بسەپێنێ، ڕاستەوخۆ جێبەجێ ناکات، نەبادا ببێتەهۆی تەقینەوەی ناڕەزایی و جوڵانی شەقام. بەنمونە حکومەت کاتێک ویستی دزی لەموچەی فەرمانبەرانی بکات، ڕاستەوخۆ نەهات پاشەکەوت لەموچەکان بکات و بیکات بەیاسا، بەڵکو سەرەتا بەچل ڕۆژ موچەیەکی دابەش ئەکرد، دواتر کردی بە پەنجا ڕۆژ و ئینجا دوو مانگ جارێک، تاکو وایلێهات خەڵک بەسوپاسەوە پێشنیاریان کرد بەشکوم حکومەت بتوانێت مانگانە نیوموچەیەک دابەش بکات.
چوارەم/ تەماشاکردنی کۆمەڵگە وەک کۆمەڵێک مناڵی بچوک
ئەگەر کەمێک بە ووردی لە وتارو بەیاننامەو پەیامی حکومەت و بەرپرسان بڕوانیت، بۆت ڕووندەبێتەوە پەیام و وشەو پەرەگرافەکان پڕن لە سوکایەتی، تاک و کۆمەڵگە بەمناڵی بچووک کەم فام دەدەنە قەڵەم، هەندێکیشیان کۆمەڵگە بە سەگ ئەچوێنن، گەر نانی پێنەدەیت، پێت ئەوەڕێت.
پێنجەم/ ختوکەدانی سۆزی هاوڵاتیان.
هەرکاتێک حکومەت بیەوێت پلانێک لەسەر هاوڵاتیانی جێبەجی بکات، پلانەکە جۆرێک لە ناڕەزایی یان نائومێدی لای خەڵک دروست دەکات، خێرا دەسەڵاتداران لەخاڵی لاوازی هاوڵاتی ئەدەن و کۆمەڵێک وشە ڕیز ئەکەن بۆ ختوکەدانی هەستی نەتەوەیی، وەک بازرگانیکردن بەوشەی ئاڵاو پێشمەرگەو خاک و ناوچە دابڕێنراوەکان.
شەشەم/ پەکخستنی پەروەردەو فێرکردن
حکومەت هەمیشە گرەو دەکات لەسەر ئەوەی کۆمەڵگە زیاتر بەرەو تاریکی و نەزانی بەرێت. دامەزراوە ئەکادیمیەکان، پەیمانگاو زانکۆکان ئەکات بە ناوەندی حزبی و هیچ بەهایەک بۆ مامۆستاو خوێندکارو بڕوانامە ناهێڵێتەوە. ڕێژەی دەرچون و توێژینەوەی زانستی و پێگەیاندنی کادری ئەکادیمی پاشەکشە ئەکەن. چونکە دەسەڵاتداران ناخوازن چینێکی ڕۆشنبیر دروست ببێت، دواتر داوای بەشداری سیاسی و مافەکانی بکات.
حەوتەم/ هەستکردن بەتاوان.
سیاسەتی حکومەت بەجۆرێکە کار لەسەر خەساندنی تاکی بەهرەمەند ئەکات، مرۆڤی داهێنەر لەجیاتی ئەوەی پشتیوانی ماددی و مەعنەوی بکرێت، نائومێد و بەلاڕێدا دەبرێت. حکومەت کار لەسەرئەوە دەکات ئەو تاکانەی لەدۆخی ناهەموار و ئاریشەدا دەژین، ئۆباڵی خراپی ژیان و بارودۆخیان بخەنە ئەستۆی خۆیان و گلەیی لەئاستی زیرەکی و تواناکانی خۆیان بکەن. دواجار لەجیاتی ئەوەی لەحکومەت یاخی ببن و داوای ژیانێکی باشتر بکەن، هەستی تاوان لەناخیاندا زیاتر چەکەرە دەکات.
هەشتەم/ خواردنی نێچیرە بچوکەکان.
حکومەت سیاسەتی پەرتبکەو زاڵبە دژی ئەو دەستەو گروپ و حزبانە پیادە دەکات کەدواجار ناڕژێنە ناو بەرژەوەندی خۆیانەوە. لەڕێگەی پارەو هەژموون و پیاوەکانیان، دەسەڵاتداران سەرجەم توانایان دەخەنەگەر بۆ گەورەتر کردنی درزی نێوان کۆمەڵەو ڕێکخراو و پارتەسیاسیە ئۆپۆزسیۆنەکان. تێرۆری فیکری، تێرۆری کەسێتی، تیرۆری مەعنەوی و فیزیکی دژی هەرکەسێک پیادەئەکەن کە مل نەدات بۆ دەستەمۆ بوون.
سۆران عەزیز
14-7-2018