کەمال ئەسکەندەر
ئەوەی ئێستا لەپایتەخت دەگوزەرێ دەرخەری ئەو مەترسیەیە کە بەردەوام فراکیسۆنی کۆمەڵ لەپەرلەمانی کوردستان درکی پێکروە و داوای پەکخستنی یاسای تیرۆری کردوە ، چونکە کاڵایەکی حازر بەدەستی دەسەڵات بوە وەک تەونی جاڵجاڵۆکە بۆ گرتنی ئەندامانی حزب وھێزە ئۆپۆزسیۆنەکان .
کاتێک ھەر ڕووداو و پێشھاتێکی نەخوازراوی ئەمنی ڕوودەدات بێ یەک و دوو چەند فیلمێکی لەسەر دروست دەکرێ بۆ تێوەگلانی کەسە کاریگەرەکانی کۆمەڵگە .
کاتێ بینای پارێزگا لەئەنجامی کەم وکوڕی ونەبونی بەرنامەیەکی تۆکمەی ئەمنی چەند کاتژمێرێک دەکەوێتە دەستی سێ ھەرزەکاری نەعل لەپێ ، کێ لێی بەرپرسە؟
ئەو چەکانەی ھەرزەکارەکان بەکاریان ھێنا ھی کێن؟
باوکیان لەکام حزب و دەزگای حکومەت کاردەکەن ؟
بۆ دوای ڕووداوەکان پلانی ئەمنی بونی ھەیە ؟ ئەدی پێش ڕووداوەکان چی ، مەگەر دەکرێ بینای بەرزترین یەکەی ئیداری کەپارێزگایە یەک پۆلیس پاسەوانی بێ ؟
مەگەر لێدوان و ڕوونکردنەوە جیاوازەکانی بەرپرسانی ئەمنی بۆ گۆڕینی ئاڕاستەی ڕووداوەکانە ؟ یان لەئەنجامی بێ بەرنامەیی یانە؟
لەکۆتایی دا ئەوەمان بۆ ڕوون دەبێتەوە لەگەڵ ھەر پێشھاتێکی نەخوزراو بێ سەروبەری زیاتری حکومڕانی کوردیمان لەھەرێمی کوردستان بۆ ئاشکرا دەبێ ، ئیتر بەئومێدی کوردستانێکی ئارام و دوور لە تەنگەژەی ئەمنی وسیاسی .