دژ بە نائومێدیی

لەلایەن ستاندار Posted on 369 جار بینراوە
ئارام قادر حەمەسور
نائومێدیی هەورێکی ڕەشە بۆ کۆمەڵگاو ئاسایشی کۆمەڵایەتی دەخاتە مەترسی و زریانی کەوتنی کۆمەڵگایە، ئێستای هەێمی کوردستان بریتییە لە قۆناغی نائومێدی سیاسیی. دەسەڵات توانی براوەبێت و کۆمەڵگا بەرەو نائومێدیی بەرێت، چونکە زۆرینەی نائومێدەکان بەرەی ئۆپۆزسیۆنن، ئەوانەی چەندین هەڵبژاردنە متمانە دەدەنەوە بە ئۆپۆزسیۆن. نائومێدیی بەرنامەیەکی سیاسیی دەسەڵات بوو بۆ بچوککردنەوەی ئۆپۆزسیۆن و ڕوحیەتە ناڕازییەکان، هێزەکانی دژە دەسەڵات دەبێت دانبنێن بەم شکستە سیاسییەو بە شێوەیەکی تر ئومێد دروست بکەنەوە.
ئێستا هێزە ئۆپۆزسیۆنەکان لەبەردەم تاقیکردنەوەیەکی گەورەدان، لەنێوان دەسەڵاتێکی گەندەڵ و نادیموکڕاسیی و کۆمەڵگایەکی نیوە نائۆمێد، نائومێدەکانی ئەمڕۆ ئەوانەبوون کە ئۆپۆزسیۆنیان گەورە کردبوو، ئەوانەبوون شەقامیان گەرم دەکردو خۆپیشاندانەکانیان کردبووە مەترسی بۆ سەر دەسەڵات. نائومێدەکان لەنێوان دەسەڵاتێکی کەڕو ئۆپۆزسیۆنێکی نەرمدا گیریان خواردووە، دەسەڵاتێک گوێ لەداخوازییەکانی شەقام ناگرێت و ئۆپۆزسیۆنێکیش زۆرکات ناڕەزاییەکانی شەقامی قوتداوەو لە قومار و دانوستانی سیاسییدا دۆڕاندویەتی، زۆرکات ئۆپۆزسیۆن شەقامی گڕگرتووی کوژاندۆتەوە.
هەموو نائومێدییەک دەبێتە هۆی قەڵەوبوون و بەهێزبوونی دەسەڵاتی جووت حیزب، نائومێدبوون بریتیە لە دەستکەوتە گەورەکەی دەسەڵات، دەسەڵات بێ خەمە کاتێک دەبینێت کۆمەڵگا نائومێدە، بەڵام ئەم نا ئومێدییەش دەکرێت لە داهاتوودا سەری دەسەڵات بخوات، چونکە نائومێدبوون کۆتایی هەناسەی سیاسییە و کۆمەڵگا بەرەو توندوتیژی دەبات.
هێزە ئۆپۆزسیۆنەکان دەبێت ستایلی سیاسەت بگۆڕن، دەبێت کاری هاوبەشیان هەبێت و فشارەکان بە کۆمەڵ ئەنجام بدەن، ئەگەر بڕواتان بەپاکیی هەڵبژاردن نییە هەمووتان بایکۆتی هەڵبژاردن بکەن، یان متمانەی هێزێکی نێودەوڵەتی وەربگرن تاپشتتان بگرێت. لەم ناوچەیەدا مرۆڤ زووزوو نائومێد دەبێت، لەبەرئەوەی گشت بوارەکان لەداڕماندان و وێران دەبن، بەڵام دەکرێت بەردەوام مۆمی ئومێد ئەم شەوەزەنگە ڕووناک بکاتەوە، ئەم ئومێدە گەر بچوکیش بێت دەتوانێت خەوی دەسەڵات تێکبدات. با ئومێد گڕیی دواین دەنکە شقارتەیەک بێت، با ڕێگە نەدەین بایەکی دەسەڵات بیکوژێنێتەوە. کۆمەڵگای نائومێد دەبێتە زیندان و نائومێدیی دەکاتە کولتوور، دەسەڵات بەختەوەرە لە کۆمەڵگایەکدا کە نائومێدەو بەشدری سیاسیی ناکات. کۆمەڵگا زیندووەکان بەردەوام لە نائومێدیدا ئومێد دروستدەکەنەوە تاوەکو دەسەڵات نەبێتە ستەمکارێکی تاقانە، نائومێدیی سیاسی تلیاکی دەسەڵاتە بۆ کۆمەڵگای پاسیڤ، هێزە ئۆپۆزسیۆنەکانیش لەڕابردوودا کرابونە حەلاقەی ئومێدەکان، بەڵام توانای هەڵگرتنی ئومێدەکانیان نەبووە. لەم مێژوو و جیوگرافیی و ئەزمونە وێرانەدا بەردەوام نائومێدی لەدەرگامان دەدات، دەبێت وەک سپرینگ وابین تا فشاری نائومێدی زیاتربێت وەڵاممان سپرینگ ئاسا توندبێت. نائومێدنابین و خەندە گاڵتەجاڕییەکانی  دەسەڵات ڕادەگرین، دەسەڵاتێک خەونی گەورەی کوشتنی ئومێدە.

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.