بەرەی ناڕازی و گرتنە دەستی دەسەڵات

لەلایەن ستاندار Posted on 690 جار بینراوە 0 سەرنج
Mala Farman

مەلا فرمان

لە هەرێمی کوردستان ئەگەرچی چەند لایەنێکی سیاسی وەک هێزی بەرهەڵستکاری دەسەڵاتی جوتحیزبی بونیان هەیە، بزوتنەوەی گۆڕان گاریگەرترینیانە، بەڵام نەیانتوانیوە لە ٢ هەڵبژاردنی پەرلەمانیدا کاریگەری بەرچار لەسەر گۆڕینی سیستەمی سیاسی دابنێن، چونکە:
1- بەشداریکردنیان لە حکومەتی بنکە فراوان لە گەڵ دو هێزی گەندەڵکار بەهۆی پشوکورتیان لە ئۆپۆزسیۆنبون زیانی زۆریان بەرکەوت.
2- لاوازی سەندیکاکان وەک پشتیوانیەک بۆ ئۆپۆزسیۆن.
3- نەبونی بەرنامەیەکی کارکردنی هاوبەشی پێویست.
4- ناتەبایی و لێکترازانی هێزە بەرهەڵستکارەکان، دابڕانی یەکگرتوی ئیسلامی بەنمونە بۆ ماوەیەک و لە کاتی زۆر حەساسدا، ئێستاش شەری ساردی نێوان بزوتنەوەی گۆڕان و نەوەی نوێ و تاک خستنەوەی. ئەم دابڕان و جۆرە شەڕە ئاوی ئاشی پارتی و یەکێتی پێ زیاد دەکات.
5- نەکەوتنە پێش شەقام و پشتگیری شەرمنانە لە ناڕەزایەتیەکانیان.
6- لە دەرگادانی ناوبەناوی پارتی و یەکێتی.
7- ترس و بڕوا بەخۆنەبونی ئەم هێزانە لە ئیتهامکردنییان لە لایەن پارتی و یەکێتیەوە بە خیانەتی نیشتمانی و نەتەوەیی، لە کاتێکدا ئەم دو حیزبە خۆیان بە ئاوی ئەم گۆمە هێشتا گیانیان تەڕە. ئەم ترسە بۆتە هۆی دورکەوتنەوەی ئەم هێزانە لە بەرنامەی گۆڕینی سیستەمی حوکمڕانی و چاکسازی و کۆنترۆڵکرنی گەندەڵی.
ئەم هێزانە دەبێ چی بکەن؟
1- ئەو هێزانەی چاوەڕوانیان لێدەکرێت سیستەمی سیاسی بگۆرن و پێشڕەوی میلەت بن دەبێت:
– بوێرانە هەڵوێست وەرگرن و بڕیار بدەن. بیر لە ماندوبون نەکەنەوە.
– خۆیان لە هەڵوێستی موحافزکارانە بە دوربگرن.
– خۆ بەدور بگرن لە لێکنزیکبوونەوە لە دەسەڵات بەشێوەی ژێربەژێر یان ئاشکرا.
2- هەرچی زوە ناکۆکیەکانیان بەلاوە بنێن، میدیاکانیان بکەن بەیەک و روەو دەسەڵاتی کەن.
3- ئەوەندەی بکرێت بەرنامەی ” نەوشیروان مستەفا” ببێتە چەتری کۆکردنەوەی ئەو هێزانە و کەس بە چاوی هەوێ سەیری ئەوی تر نەکات. چونکە ئەو بیرمەندە لەو کانیە ئاوە سازگارەیە کە خەڵکی گوند و هەمو رێبواران دەتوانن ئاوی لێ بخۆنەوە. لەسەر تابلۆیەکیش نوسراوە ” ئێمە هاتوین بۆ ئەوەی حقدی سیاسی نە هێڵین”.
4- ئەوەندەی بکرێت ژمارەی دۆستەکانیان زیاد کەن، لە ناو حیزبەکانی تر و جەماوەر.
5- چاویان لەوە بێت چۆن سیستەمی حکومڕانی بگۆرن، پێکەوە کورسیەکانیان چەندە، نەک یەکی چەند کورسی دێنن.
6- دوای هەڵبژاردن پەرتەوازە نەبن و بە شیرینی دەسەڵات فریو نەخۆن. بە تایبەتی ئەو شیرینی خواردنەی لەگەڵ پارتی و یەکێتی تاقیکرایەوە و زیانی زۆری بە بەرەی ناڕازی گەیاند.
7- بە بەرنامەیەکی رون و سادە و یەککرتو ئومێدی گۆڕان و چاکسازی بگەڕێننەوە بۆ جەماوەر.
دوا دو خاڵ کە زەرورە بگوترێن:
1- ” هەمو ئەو هێزانە و تەواوی دەنگە ناڕازیەکان دەبێت ئەو راستیە بزانن، ئەگەر دەسەڵات تا ئێستا کاری پێکەوەییان لەسەر پەرتەوازەبون و لاوازبونیان کردوە، ئەوا ، ئەگەر دوای ٣٠/٩ زۆرینە بێننەوە کار لەسەر بە سفر کردنەوەیان دەکات”.
2- زۆرینەی هەرە زۆری جەماوەر لەم دەسەڵاتە بیزارە، کاتی گۆڕینی هاتوە، تەنها رێک خاوەندارێتی دەوێ.

کەرکوک،١٧/٨/٢٠١٧

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *