شێرزاد شێخانی
چەند رۆژێک لەمەوبەر بەبۆنەی جەژنی قوربانەوە ژمارەیەک رۆژنامەنووس وکارمەندی رۆژنامەیەکی گەورەی عیراقی بەمیوانی ھاتنە سلێمانی بۆ بەسەربردنی پشووی جەژن .. بۆ بەسەرکردن ومیواندارییان یەکترمان گرتەوە ، لەباسکردنی وەزعی سیاسی چەقبەستوی ئەمڕۆی عیراق و ئاییندەی وڵاتەکە قسەی زۆرمان کرد . سەرنوسەری رۆژنامەکە عەرەبە ، لەمیانی قسەکانیدا باسی ئەوەی بۆ کردم کەوا بەرپرسێکی باڵای پارتی پەیوەندی تەلەفۆنی پێوە کردوەو داوای لێکردوە وتارەکانی من لەرۆژنامەکەیدا بڵاو نەکاتەوە ! . بەقسەی سەرنوسەرە عەرەبەکە دەڵێ ، پێمگوت ” ئێوە ئەگەر کێشەی شەخسیتان لەگەڵ ئەم نوسەرە ھەیە، ئەوە پەیوەندی بەمنەوە نیە ، ئەگەر کێشەشتان لەگەڵ وتارەکانیەتی ، ئەتوانن بە وتار وەڵامی بدەنەوە منیش وەکو عورفی رۆژنامەنووسی بۆتان بڵاوی ئەکەمەوە “.
ساڵانێک بەر لەئێستا لەرۆژنامەی ( الشرق الڕوسگ ) ی لەندەنی وەکو پەیامنێری کوردستان کارم ئەکرد ، نزیکەی چواردە ساڵ لەم کارە بەردەوام بوم ، بەڵام کاتێک وتارێکی رەخنەییم لەحکومەتەکەی نێچیرفان بارزانی لە پێگەی ( ئیلاف ) بڵاو کردەوە ، سەرانی پارتی بەفشارێکی زۆر لەرێگەی کەسێکی ناو ئەم رۆژنامەیە توانیان لەم رۆژنامەیە دەرم بکەن .. چەند مانگێک پێش ئێستاش جارێکیتر رۆژنامەکە پێویستیان بەمنەوە ھەبو ، گەڕاندنمیانەوە سەر کاری پەیامنێری بۆ دوو مانگێک ، بەڵام دوای ئەوەی پارتیەکان پێیان زانی ، جارێکتر توانیان فشار بخەنە سەر رۆژنامەکەو دەرم بکەنەوە .
ھەر لەم ماوەیەدا لەسەر ئەوەی لەمیدیاکانی یەکێتیدا لەچەندین دیداری تەلەفزیۆنیدا بەشداریم کردوەو رەخنەم لەسیاسەتەکانی پارتی گرتوە، لەرێگەی کۆیلەکانیان لەباڵادەستەکانی ناو یەکێتیەوە توانیان دەرگای ئەو کەناڵانەی یەکێتیشم لێدابخەن .
لەوەتەی دەستم بەنوسین کردوە قەت وشەی زبرم بەرامبەر بە ھیچ لایەنێکی سیاسی بەکار نەھێناوە ، لەرەخنەی سیاسی بەولاوە ھیچ شتێکی ناشرین بەرامبەر نەیارەکانم نەوتوە، رەخنەکانیشم ھەمووی لەپێناو میللەتەکەی خۆم وداکۆکیکردن بوە لە نەھامەتیەکانی لەبەرامبەر دەسەڵاتە زاڵمو ستەمکارەکان ، بەڵام ئەم حزبانەی کوردستان بەتایبەتیش پارتی وبنەماڵەکەیان لەزمانی رەخنە تێناگەن ، بۆیە ھەرچی لەدژیان بوەستی یا پۆخڵەواتەکانیان بخاتە روو ، یان دەمکوتی ئەکەن ، یان لەناوی ئەبەن ، نمونەشمان زۆر بینیوە لەمبارەیەوە کە دەسەڵاتی دیکتاتۆری پارتی چۆن مامەڵە لەگەڵ قەڵەمە ئازادەکاندا ئەکات ، چەندین کەسی لەناوبردوە لەسەر رەخنەگرتن لێیان .
من سێ ساڵە لەزێدی بابوباپیرانم دوورم ، لەترسی پیلانەکانی پاراستنی پارتی ناتوانم سەردانی گۆڕی دایکو باوکیشم بکەم لەھەولێر ، ترسی ئەوەم ھەیە کۆیلەیەک یا بەڵتەچییەکی پاراستن زەفەرم پێ بباتو دواتر وتەبێژی پۆلیسەکەیان بێتە سەر تەلەفزیۆن و بڵێ ” لەسەر کێشەی کۆمەڵایەتی لەناوبراوە “؟!. دۆسیەکەشم بنگۆم بکرێ وەکو ھەمو دۆسیەی ئازادیخوازەکانی پێشتر .
رۆژنامەنوسێکی ھاوڕێم گێڕایەوە کەوا لەرێگەی موختاری گەڕەکەوە کارەبای موەلیدەیان لەسەر بڕیوە ! . ھاوڕێیەکی تر سەرۆکی دەزگایەکی میدیاییە لەھەولێر فەرمووی ” لەھەولێر خانویەکیان دەستناکەوێ بۆ بارەگاکەیان، چونکە پاراستن ھەڕەشە لەھەر خاوەن خانویەک ئەکات ئەگەر خانوەکەی بەکرێ بدات پێیان ” ؟!. نوسەرێک گیڕایەوە ” لەناو تەکسیدا ھەندی رەخنەی لەپاشەکەوتی مووچە گرتوە، یەکسەر سایەقەکە بۆ ئاسایشی ناو قایممقامیەتی ھەولێری راپێچ کردوە ؟!.
ئەم ھەڵسوکەوتانەی پارتی وسەرانی بنەماڵە ، قەڵەمەئازادەکان ھارتر ئەکات ، نانبڕین و دەمکوتکردن سیاسەتێکی فاشیلی رژێمە دیکتاتۆرەکانی ناوچەکەیە زۆربەیان ھانایان بۆ بردوە، بەڵام ھیچ سوودێکی بۆیان نەبوە ، سەدام حوسێن شانازی بەوەوە ئەکرد گوایە دوو ملیۆن بەعسی لەعیراقدا بەرھەم ھێناوەو، سەدان دەزگای ئەمنی داپلۆسێنەری ھاوشێوەی پاراستنەکەی پارتی دامەزراند ، تەنانەت شوفێری تاکسیەکانیشی کردبوە جاسوسی رژێمەکەی، بەڵام لە ئاکامدا رژێمەکەشیان رووخا و ، سەدامیش لە کونە سەگی گوندێکی نزیک زیدەکەی خۆی دەرھێنراو بەرەو سێدارە بردرا.. عیبرەت وەرگرتن لەم نمونانە بۆ حزبە تازە دیکتاتۆرەکان شتێکی باشە ..