ستاندەر
شایان عەسکەری ئەندامی پەرلەمانی فراکسیۆنی گۆران لەپەرلەمانی کوردستان، بەستاندەری راگەیاند: ئەمرۆ دادگای بەرایی هەولێر لەسەر سکاڵای دووکارمەندی ئاسایش، بریاری غەرامەکردنی (٦ملیۆن) دیناری عێراقی لەدژی من دەرکرد، دکتۆرە شایەن گوتی مێژوی ئەم سکاڵایە بۆ خۆپیشاندانەکانی ۲٥ئازاری ساڵی رابردوو دەگەرێتەوە، کەتیادا من داوام لە کارمەندانی هێزە ئەمنیەکان کردبوو بێنە بەرەی خۆپیشاندەران لەبەرامبەریشدا دووکارمەندی هێزەکانی ئاسایش هێرشیان کردە سەر من، ئێستاش بەبیانوی ناو زراندنیان داوای قەرەبوو لەمن دەکەن.
سەبارەت بەبریارەکەی دادگا “بەشدار حسن” پارێزەری کەیسەکە بەستاندەری راگەیاندووە: لەرووی یاسایەوە ئێمە دەتوانین تانە لەبریاری دادگا بدەین لەدادگای تێهەڵچونەوەدا، بۆیە ئێمە لەروانگەی یاساییەوە لەهەوڵەکانی خۆمان بەردەوام دەبین.