مەلا فرمان
رەخنەو ئازادی رادەربڕین، بەدەنگەوەچونی کێشەکانی خەڵک‌و خۆ بەخاوەنزانین‌و بون بەمحامی خەڵک، رەخنەگرتن‌و لێپرسینەوە لەدەسەڵاتی جیبەجێکردن لەئەرک‌و پرەنسیپە لەپیشینەکانی بزوتنەوەی گۆڕانی رەسەنن.
لە یەکێک لە بریار و راسپاردەکانی کۆنفرانسی نیشتمانی بزوتنەوەی گۆڕانی رەسەن ھاتوە ( گۆڕان کە بەشداری حکومەت دەکات، میدیاکەی لەگەڵ خۆی نابات). بەتایبەتی لەم کابینەیە ھێشتا نازاندرێت ئایا گۆڕان بەشدارە لە دەسەڵات یان موچەخۆرە لەو کابینەیە. لە ھەموو حێ‌ڵەتێکدا دەبێت راسپاردە و بریاری کۆنفرانس وەک خۆی جێبەجێ بکرێت ” نابێت گۆڕان لەگەڵ خۆیدا میدیاکەشی بەرێتە دەسەڵاتەوە”. پێویستە خانەی راپەڕاندن و جڤاتەکان بەبێ ھیچ لێکدانەوەیەک وەک خۆی جێبەجێی بکەن.
دو ٢ پەرلەمانتاری فراکسیۆنی گۆڕان لە ئەنجومەنی نوێنەرانی عێراق چەند کەیسێکی باشیان وروژاندوە، لەوانە:
پەرلەمانتار کاوە محمد:
بە فەرمی داوا لە بەڕێز عادل عبدالمھدی سەرۆک ئەنجومەنی وەزیران و سەرۆکی ئەنجومەنی باڵای نەھێشتنی گەندەڵی دەکات کە داوا لە حکومەتی ھەرێم ( بە تایبەتی بە ڕێزان نێچیرڤان بارزانی و ئاشتی ھەورامی )، و نجمالدین کریم پارێزگاری پێشوی کەرکوک کە ناوەڕۆکی ھەریەک لەم رێکەوتنانە ئاشکرا بکەن:
رێککەوتنی نێوان حکومەتی ھەرێم و حکومەتی تورکیا سەبارەت بە نەوت و غازی ھەرێم کە بە (رێککەوتنی پەنجا ساڵە) ناسراوە. ئەم نەک ھەر پرسێکی دارایی و قوتی خەڵکە بەڵکە پرسێکی نیشتمانیە. لەگەڵ وڵاتێک ئیمزا کراوە کە سەرۆکەکەی سەرۆکی ئەملا بە سەرۆکی عەشیرەت دەزانێ.
رێککەوتنی نێوان حکومەتی ھەرێم و پارێزگاری پێشووی کەرکوک (نەجمەدین کەریم) سەبارەت بە شایستەی پترۆدۆلاری کەرکوک کە لەساڵی (٢٠١٥) دا ئیمزاکرا.
پەرلەمانتاری ناوبراو لەفەرمانگەی راگەیاندنی ئەنجومەنی نوێنەرانی عیراق و لەکۆنگرەیەکی رۆژنامەنووسیدا ناوەرۆکی ئەم ھەنگاو و داواکارییە و ھۆکارەکانی بۆ کەناڵەکانی راگەیاندن خستەڕوو.
پەرلەمانتار وشیار عبادللە
بەڕێزی بە ھاوکاری و ھەماھەنگی چەند پەرلەمانتارێکی دی دەیەوێت پێداگری بکات لە :
بە مەبەستی بەدواداچون بۆ پرسی نەوتی ھەرێم سەردانی دادگای فیدرالی عێراق دەکەن و لیکۆڵینەوە لە سکاڵای وەزارەتی نەوتی عێراق دەکەن لەسەر وەزارەتی سامانە سروشتیەکانی ھەرێم.
بەڕێزی پیداگری دەکات و دەڵێت ” دەبێت داھاتی نەوتی ھەرێم بە یاسا چارەسەر بکرێت و لە ٤چێوەی سامانی عێراقدا لە خزمەتی دانیشتوانی کوردستان بێت، نەک لە دەستی نا ئەمیندا بێت و بخرێتە خزمەتی دەستە و گروپ و بە تاڵان ببرێت.
ئەمەی ئەم دو بەڕێزە قسەیان لەسەر کردوە و بەدواداچونی بۆ دەکەن، ویستی ناخی ھەمو ھەڵسوڕا و گۆڕانخوازێکە چونکە دەقاودەق ئەرکی خۆیان نەک ھەر وەک پەرلەمانتارێکی بزوتنەوەی گۆڕانی رەسەن جێبەجێ دەکەن بەڵکە ئەرکی وەفای خۆشیان وەک محامی خەڵکی کوردستان جێبەجێ دەکەن . ئەم ھەنگاوانە نەک ھەر جێی رێز و تەقدیرە بەڵکە دەبێت ھەمومان پشتیوانیان بین. نمونەتان زۆر.
لە بری خۆسەغڵەتکردن، دەبو کادرەکانی پارتی و پەرلەمانتارەکانیان پشتیوانبونایا. ئەمە کارێکی یاساییە و بەندە بە پرسی نیشتمان و قوتی خەڵکەوە، رون و ئاشکرایە. بۆیە ناکرێ و نابێت و ناگونجێ ئەم کارەش وەک فشە و بیری نەتەوەیی ساختە و درۆ بەخەڵک بفرۆشرێتەوە.