ستاندەر
دژ بەگرانكردنی نرخی بەنزین لە زۆرینەی پارێزگاكانی ئێران خۆپیشاندانی گەورە ئەنجامدراوە لە نێویاندا لە رۆژهەڵاتی كوردستان، بەپێی ناوەندی ئاماری هەنگاو، ڕۆژی شەممە لانیکەم ٩٠ هاووڵاتی لە شارەکانی جوانڕۆ، سنە و مەریوان بە تەقەی ڕاستەوخۆی هێزە چەکدارەکانی ئێران بوونەتە قوربانی کە ١١ کەسیان شه‌هید بوون.
هاوكات دوای چربوونەوەی نارەزاییەكان، رژێمی ئێران سەرجەم هێلەكانی پەیوەندی و ئەنتەرنێتی لەسەرتاسەری وڵات بریوە و چالاكانیش رایدەگەیەنن ئەوە بۆ شاردنەوەی ئەو قەسابخانەیەیە كە دەسەڵاتدارانی ئەو وڵاتە بۆ دامركاندنەوەی خۆپیشاندان ئەنجامی دەدەن، بەجۆرێك چاودێران و چالاكانی سیاسی رایدەگەیەنن ئەو توندوتیژیەی لەو رۆژانەی سەرەتای خۆپیشاندان و راپەرین ئەنجامدراوە لە مێژوی كۆماری ئیسلامی وێنەی نەبوە و تەنانەت لە شۆرشی روخاندنی شای ئێرانیش بەكارنەهاتووە، لەلایەكی تر لەنوێترین پەیامیدا خامەنائی رێبەری كۆماری ئیسلامی ئێران رایگەیاند دەبێت بەرزكردنەوەی نرخی بەنزین جێبەجێبكرێت.