نەورۆز، لە دەوڵەتەوە بۆ مووچە

لەلایەن ستاندار Posted on 259 جار بینراوە 0 سەرنج
o55

هیوا سەید سەلیم

ساڵانێك بوو لەگەڵ هاتنی چەژنی نەورۆز و وەرزی بەهار بانگەشەكان لە هەرێمی كوردستان بۆ ڕاگەیاندنی دەوڵەتی كوردى گەرم دەبوو، بەر لەوەی بێمە سەر ئەوەی ئایا ئەو بانگەشانە چەندە كاری جدی بۆ كرابوو وەیان بپرسم ئەرێ بەڕاست بەرپرسانی هەرێم جدی بوون بۆ ڕاگەیاندنی دەوڵەت یان هەر قسە بوو؟
دەمەوێت دوو پرس لێك هاوێر بكەم كە زۆر جار لە كوردستان بە ئەنقەست بێت یان لە نەزانی لە نێو میدیا و رای گشتی لە هەرێمی كوردستان تێكەڵاو دەكرێت، ئەویش سەربەخۆی كوردستان وەك ماف و سەربەخۆیی لە دیدی دەسەڵاتدارانی هەرێمی كوردستان واتا هەڵسەنگاندنی ئەو مافە لە دیدگا و سلوكی ئەو دەسەڵاتە.

سەربەخۆیی كوردستان مافێكی ڕەواو و بێ چەندوچۆنی خەڵكی كوردستانە وەك میللەتێكی نیشتمان داگیراو بەش بەشكراو، وەلێ كاتێك مێژووی كورد دەخوێنینەوە تێدەگەین لە ڕابردوو چەندە دووژمنانی كورد كۆسپ بوونە لەبەردەم گەیشتنی گەلی كوردستان بەو مافە بە بارتەقای ئەوەش كورد خۆی هۆكاری نەگەیشتن بووە بە ئامانجی خۆی لە سەربەخۆیی كوردستان، دیارە كە دەڵێین كورد مەبەستمان دەسبژێری سیاسی و حوكمڕانانی كوردە نەك تێكڕای میللەتەكە.

نموونەش بۆ ئەوە ڕایەشمان، دوایین هەوڵی ڕاگەیاندنی سەربەخۆیی كوردستان بوو لە باشووری كوردستان، كە لە رێگەی ریفراندۆمی ٢٥ ئەیلول ئەنجام درا، ریفراندۆم هەڵە نەبوو ئەوەی هەڵەبوو بریتی بوو لە خراب خوێندنەوەی هاوكێشە دەولی و ئیقلیمی و ناوخۆییەكان و هەڵبژاردنی كات و میكانیزمەكە، بۆیە دەبینین دوای ئەو شكستە ناچار دەكرێین ئاستی داخوازییەكانمان هێندە دابەزێت كە هەرگیز بەراورد ناكرێت.
ئاخر چۆن بەراورد لە نێوانی ڕاگەیاندنی دەوڵەت و جیابوونەوە لە بەغدا و دەست پانكردنەوە بۆ ناردنی مووچە لە بەغداوە دەكرێت؟!

دەكرێت لە هەر نەورۆێك كورد ببێتە خاوەنی دەوڵەتی خۆی، چونكە ئەزموونی كورد لەگەڵ عەقڵیەتی حوكمڕانی لەو وڵاتانەی كوردستانیان بەسەر دابەشكراوە ناچاری ئەو هەنگاوەمان دەكەن، ئەمە چ جای ئەوەی ئەوە مافێكی ڕەوای خەڵكی كوردستانە، بەڵام دەوڵەت زەمینەسازی دەوێت و دەبێت دووربێت لە پڕوپاگەندەی حزبی سیاسی.

ئامادەسازیەك كە ئیرادەی سیاسی و جەماوەری لە پشت بێت نەك ئەوەی ئێستا لە باشووری كوردستان هەیە، كە بریتە لە سیاسەتی بێ ئیرادەكردنی خەڵك و فەزایەك كە لە دەرەنجامی شكستی ئەو دەسەڵاتە خەڵك متمانەی بە زۆر شت لەق بووبێت، كە ئەمەشیان دەرەنجامی شكستی حوكمڕانی چارەگە سەدەیەكی حوكمی حزبیە لە هەرێمی كوردستان.

ئاخر كە باس لە شكستی حوكمڕانیتان دەكەین دەبێت دەستهەڵبڕن نەك نیگەران بن، هەزار یەك نموونەش بۆ گەواهی فەشەلی ئێوە هەیە و چارەسەریش تەنیا سندوقەكانی دەنگدانە تا خەڵك تۆڵەی ئەو شكستەتان لێبكاتەوە.

ئەوە نیە دوای ئەو هەموو كارەسات و ماڵوێرانیەی كە رووبەڕووی خەڵكی كوردستان بۆتەوە، لە دەرەنجامی قەیرانە سیاسی و ئابووری و حوكمڕانیەكانی ئێوە، كە باری گرانی كەوتۆتە سەرشانی خەڵكی هەژار و كەم دەرامەتی كوردستان، تاز بە تازە چاوتان لەوەیە بەغدا مووچە بۆ وەزارەتەكانتان بنێرێت و سەری زمان و بنی زمانی بەرپرس و وەزیرەكان بۆتە ئەو موژدەیەی كە دەڵێن “تا نەورۆز بەغدا مووچەی دوو وەزارەتی پەروەردە و تەندرووستی دەنێرێت”

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *