ستاندەر
لەبارەی ئەو داواكاریانەی كە داوایان كردووە رێوشوێنەکانى کۆنتڕۆڵکردنى چەک لەلایەن بەغداوە پێشمەرگەش بگرێتەوە فراكسیۆنی پارتی لە بەغدا روونكردنەوەیەكی بڵاوكردەوە.
لەمبارەیەوە ئارام باڵەتەیی وتەبێژى فراکسیۆنى پارتى لە پەرلەمانى عێراق لە بەیاننامەیەکدا ڕایگەیاند “هەندێ لایەن و کەس دەرکەوتوون کە هەوڵدەدەن کارتەکان تێکەڵ بکەن و داوادەکەن رێوشوێنەکانى بوونى چەک تەنها لە دەستى دەوڵەت پێشمەرگەش بگرێتەوە”.
وتیشى “پێشمەرگە شەرعیەتى دەستورى هەیە بەپێی بەندى پێنجەمى ماددەى ١٢١ى دەستور، ئەو کەسانەى ئەو داوایانە دەکەن بڕوایان بەدەستور نییە یان لێی تێناگەن”.
چاودێران پێیان وایە ئەو هەوڵە نوێیە لە بەغدا لە پەراوێزی ئەو گۆرانكاریانەی ئەو دواییە دێن، كە لە زینی وەرتێ و هەندێ ناوچەی تر ڕوویان داوە، هەروەها دەستگیركردنی چەكدارانی هێزی پێشمەرگە رۆژ لە لیبیا كە راگەیەنرا لە هەولێر مەشقیان پێكراوە، لەگەل هەولەكانی تری هێزە توركمانی و عێراقیەكانی دژ بە پێگەی هەرێمی كوردستان.