د.هەڤین كەمال
بەتەواوی لەیادم نییە دە ڕۆژ بوو یاخود دووھەفتە لەمەوبەر، کەکچێکی ئەسمەری ڕەشتاڵەی لاواز لەگەڵ سکرتێرەکەم دەرگای ژوورەکەمیان کردەوە لەکلینیک و ھاتنە ژوورێ .
سکرتێرەکەم دەستێکی بەئاراستەی ئەو ڕاکێشا و ووتی : دکتۆرە وەرەقەم بۆ پڕ نەکردۆتەوە، ئەم بۆ پشکنینی پێش بەنجی گشتی ھاتووە بیبینیت. فەرمووم لێکرد و ئەویش لەبەردەممدا دانیشت، بەھێمنی و ووردی لەڕووخساریم ڕوانی ، کچێکی گەنجی بەھێز دیاربوو ھەرچەندە لاواز بوو، ڕووخسارێکی ئەسمەر ، ھیچ جۆرە ماکیاژێک و ئارایشتێکی پێوەنەبوو، زەردەخەنەیەکی جوان لەسەر ڕووخساری بوو . پانتۆڵێکی کاوبۆو قەمیسێکی پانی لەبەردا بوو، لەو جۆرە کچانە بوو کە شێوەیان پێت دەڵێت ژن بەھێزە و لەتوانایدایە هەموو شتێک بکات و تەنیا بۆ چێژ بەخشین دروست نەکراوە .
نازانم بۆ حەزمدەکرد تا دەھات زیاتر سەیری بکەم و سەرنجی بدەم و ھیچ ووشەیەک نەڵێم ! لەبەر کەمی ماوەکەم ناچار بووم لێم پرسی : فەرموو ، نەشتەرگەری چیت بۆ دەکرێت ؟ دکتۆر ، ھاوڕێکەم سووتاوە لەکاتی بۆردومانی تورکەکان دا و لە ٥٠٪ ی زیاتر لەجەستەی سوتاوە، و دوو بەیانی نەشتەرگەری بۆ دەکەن، لەپێستی من لێدەکەنەوەو دەیدەن لە ڕانی ئەو ، ووتیان دەبێت پزیشکی بێھۆشکارەکە بت بینێت و ئەو بڕیار دەدات تۆ گونجاوی بۆ بێھۆشکاری یاخود نا . : ئەھا ، یانی تۆ پێستی خۆت ئەبەخشیت بە ھاوڕێکەت ؟ ھێندەت خۆشدەوێت ؟! ئەی ھاوڕێکەت خزمتە؟ ھیچ پەیوەندییەکی خوێن دەتان بەستێتەوە بەیەک ؟ : بۆ ھەر دەبێت خزم بین ؟ : نەخێر مەرج نییە بۆ ئەم نەشتەرگەرییە ، بەڵام لام سەیر بوو کەڕازی بوویت پێست بدەیت بەھاوڕێکەت بەخۆشحاڵییەوە، بێ ئەوەی ھیچ پەیوەندییەکی خوێن ھەبێت لە نێوانتان.
ھەتا ئێستا ئەوەی بینیبێتم تەنھا دایک و باوکەکان بوون ڕازی بوون پێست ببەخشن بە منداڵەکانیان کەسی ترم نەدیووە، بۆیە لام جێگای سەرسوڕمان بوو . : دکتۆر گیان ، ئێمە لەبناری ئەو قەندیلە ھەموومان خوشک و براین جیاوازی نییە . من خەڵکی باشووری کوردستانم و لە گوندەکانی دەوروبەری ھەولێر گەورەبووم ، ئاگرینی ھاوڕێم خەڵکی باکوورە ، بەڵام پەروەردەی ئێمە جیاوازی ناکا ، ئێمە لەگەڵ یەک دەژین ، لەگەڵ یەک دەخۆین و دەخۆینەوەو دەخەوین ، و لەگەڵ یەک بەرامبەر تورکی فاشیست دەجەنگین . ئیتر خێزانیش ھەر ئەوەیە، بەڵام ئێمە خێزانێکی کەمێک گەورەین لەخێزانەکانی دی ناچین . : بەڕاستی واتلێکردم بێم بۆ بناری قەندیل، باشە ئەی ئەزانیت لەوانەیە جێگای ئەو پێستەی لێت دەکرێتەوە ناشرین ببێت و ببێت بە پەڵە و نەتوانی دەریبخەیت ؟ ڕازیت ؟ پێت ناخۆش نابێت ؟ : دکتۆر ئەوە بەڕاستە ؟! ئێمە چەندین کوڕ و کچی گەنجمان دەست و قاچیان پەڕیوەو لەدەستداوەو ئێستاش لەبەرەی جەنگدان دژی تورکی فاشیست، بەڕای تۆ بۆمن گرنگە پێستەکەم ناشرین دەبێت و لەکەدار ببێت ؟! : ببورە من وەک پزیشکێک ئەرکی سەرشانمە پێت بڵێم، و بیرکردنەوەی زۆرینەی خەڵکیش وایە، بۆیە پرسیم . ئێستا بڕۆ پاڵکەوە با پشکنینت بۆ بکەم.
دوای تەواوبوونی پشکنینەکە و پێدانی ڕێنماییەکان ، سەرنجەکانم لەسەر ڕەچەتەی پزیشکیەکەم نووسی و دامە دەستی و خوا حافیزیم لێکرد . لەدوایی ئەو کەوتمە بیرکردنەوەیەکی قووڵەوە ، باشە ئەبێت پەروەردەی ئەوان چ جیاوازییەکی ھەبێت لەگەڵ ئێمە ؟! باشە ئەوان بۆ ھێندە بەھێز و بەجەرگن و ئێمە بۆ ھێندە لاواز و بێ دەسەڵاتین! ئەوان بۆ بەدەستھێنانی مافی خۆیان ئەندامانی جەستەیان لەدەست دەدەن و شەڕ دەکەن و شەھید دەبن .
ئێمەش لەسۆشیاڵ میدیا بەترسەوە لەپشتی مۆبایلەکانمان ھاشتاگ و پۆستی فەیسبووک و قسەی پڕوپووچ بڵاودەکەینەوەو گلەیش دەکەین لە بەختی خۆمان . باشە ئەو ئایدیا و بیرو ئیمانە بەهێزە چییە ئەوان کۆدەکاتەوەو وایان لێدەکات هێندە بەهێزبن ، و ئێمەش بۆ هێندە بێ باوەڕ و لاواز و بێ پرینسیپڵ و بنەماین . ئەوان نەشتەرگەری دەکەن مەترسی بێھۆشکاری گشتی قبووڵ دەکەن و پێستیان لەکەدار دەکەن بۆ ڕزگارکردنی ژیانی ھاوڕێکانیان .
ئێمەش گەنجەکانمان چەندین نەشتەرگەری زیادە دەکەن بۆ جوانکردنی لوت و دەمووچاو لێو و چەناگەیان و کەچی ھەر ناشتوانین نیو ھێندەی ئەوان جوان بین . ئەوان پێست دەبەخشن و خۆیان لەکەدار دەکەن ، ئێمەش پلازمای خوێنە کە بەخشینی ھیچی تێناچێت خەریکە دەبێت بە خزم خزمێنەو بازرگانی و پاڕانەوە بۆ ڕزگارکردنی ژیانێکی تر . باشە ئەوان بە پێستە سووتاوەکەیانەوە لەبەر تیشکی خۆر و لوتە باریک و لێوە زەردەکانیانەوە بۆ ھێندە جوانن ؟! و ئێمەش بە دەمووچاوە ھەڵئاوساوە پڕ سلیکۆن و لێوە پڕ فیللەر و لوتە ھەڵقرچاوەکانمانەوە کەسامانێکیان تێچووە بۆ ھێندە ناشرینین ؟! کەگرتە ڤیدیۆکانی ئەوان دەبینیت حەزت بەژیان دەبێت، حەزت بەسروشت دەبێت ، حەزت بەشادی دەبێت و گەشبین دەبیت و لەمانا ڕاستەقینەکەی ژیان تێدەگەیت کەخۆشەویستی و باوەڕە . کەگرتە ڤیدیۆکانی کچانی خۆشمان دەبینیت بە لێوێکی پڕ فیللەر و دەمووچاوێکی ھەڵئاوساوەوە گۆرانی گەعدە دەڵێنەوە لەسناپ، ژیانت لەبەر چاودەکەوێت و ڕووە ڕاستەقینە ڕەشەکەی سیستمی سەرمایەداری دەبینیت . باشە ئێمەی کوردی باشوور لەچ زەلکاوێکدا دەژین ؟ بۆ واخۆمان لێ وونبووە ؟ کەی بەخەبەردێن و ئەوان وەک نموونەیەک سەیربکەین و ھیچ نەبێت کەمێک لاساییان بکەینەوە.
نازانم ، لەوانەیە ھەرگیز نەتوانین وەکو ئەوان بین ، بریا بمانتوانیایە نیو ھێندەی ئەوان بەجەرگ بین ، بریا یەکێک بوومایە لەوان و لەو بناری شاخە ژیانم بەسەربردایە و وەکو ئەوان نموونە بوومایە. بریاو ھەزار بریای تر لەمێشکما بوو ، لەپڕ دەنگێک بانگی کردم و وەرەقەیەکی دایە دەستم : دکتۆر ئازاری پشتم ھەیە بۆ سێ مانگ دەبێت . ھێندە تێڕامابووم لەبیرکردنەوەکەمدا ، بێ ئاگا بووم لەوەی نەخۆشێکی دی ھاتبووە ژوورێ !