ستاندەر
چیا ونما نەوشیروان مستەفا نامەیەكی كراوە ئاراستەی لیژنەی كۆنفرانسی بزوتنەوەی گۆڕان دەكەن، تیایدا لەبەشێكی هاتووە:” ئێمەی کوڕانی نەوشیروان مستەفا وەک دوو هەڵسوڕاوی بزوتنەوەی گۆڕان ئەوەش بڵێین:لە سەر پرسی گردەکە جارێکی تر دڵنیایی دەدەینەوە کە تاکە بژارد ەو خواستی باوکمان ئەوە بوو کە گردی زەرگەتە ماڵ و قەڵای گۆڕانخوازان و گۆڕانێک دەبێت کە لە بەرەی گەلدا بمێنێتەوە، جێگەیەک بێت بۆ خزمەتی گشتی و بەرگریکردن لە چاکەی گشتی، لە پاڵ ئەوەشدا خەونەکانی باوکمان ئەهێنینە دی بە دامەزراندنی ناوەندێکی رۆشنبیری بۆ پێگەیاندن و خزمەتکردن بە نەوەکانی داهاتوو. لە کۆتایشدا ئەڵێن، ئێمە قسەی دڵی زۆرینەی خەمخۆرانی گۆڕان و خۆمان کرد.
لەبەشێكی تر هاتووە:ـ بزوتنەوەکە دەست بە سەرپێخستنی پرۆسەیەکی ئاشتەوەیی سەرتاسەری بکات و بێدودڵی لە نزیکەوە هاوڕێ ناڕازیەکان بە سەر بکرێنەوە (بە تایبەت ئەوانەی کە دوای دورکەوتنەوەش لە گۆڕان سەر راستانە بە هەڵوێست و کردار وەک گۆڕانخواز مانەوە)، پێداگرانە داوایان لێبکرێت بگەڕێنەوە بۆ ناو بزوتنەوەکەی خۆیان و شان بدەنەوە بەر ئەو بڕیارو هەنگاو و کارانەی کە بۆ بەهێزکردنەوەی گۆڕان پێویستن و هاوکات بەڵێن و دڵنیاییان پێبدرێت، کە بەڵێ ئیرادەی تەواو هەیە بۆ دوبارە هەستانەوە و کارکردنی بە کۆمەڵ.”
دەقی پەیامەكە بخوێنەوە
بەڕێزان: ئەندامانی جڤاتی نیشتیمانی
بەڕێزان: ئەندامانی جڤاتی گشتی
بەڕێزان: خوشک و برایانمان لە لیژنەی کۆنفرانس
سەرەتا بە گەرمی دەستخۆشیتان لێدەکەین بۆ ماندوبونی رابردوتان دەربارەی ئامادەکاریەکانی بەستنی دوەم کۆنفرانسی نیشتیمانی بزوتنەوەی گۆڕان. هەرچەندە هەر لە سەرەتای ئامادەسازیەکانەوە تا ئێستا، چەند جارێک راو بۆچونی خۆمان لە گەڵ باس کردوون و جەختمان لە سەر ئەوە کردوەتەوە گەر لەم کاتەدا کۆنفراسێک نەبێت بە چەتری کۆکردنەوەی گۆڕانخوازانی رازی و ناڕازی، ئەوا ئەنجامنەدانی باشترە . تا ڕاو قسەکانمان وەک خۆیان بگەن و تەفسیری تریان بۆ نەکرێ، دیسان بە پێویستمان زانی لە سەر دۆخی بزوتنەوەکەمان ئەم نامەیەتان بۆبنێرین. لێرەدا ئەبێت ئامادە بەو ڕاستیە بدەین کە جگە لەوەی کە ناوەڕۆکی ئەم نامەیە ڕاو سەرنجی شەخسی خۆمانە، بە هەمان شێوە گوزارشت لە ڕای ئەو دۆست و هەڵسوڕاوە دڵسۆزانەش ئەکات کە لە رابردودا ئێمە چەندین دیدارو گفتوگۆمان لەگەڵ کردون و، بەوپەڕی خەمخۆریەوە پرۆژە و پێشنیازی خۆیان بۆ چۆنێتی بەهێزکردنەوەی بزوتنەوەکە و پرۆسەی ئاشتەوەیی خستوەتەروو.
بەڕێزان، ئێمە ئەزانین ئەنجامدانی کۆنفرانسی نیشتیمانی پێویستیەکی یاسایی و رێکخراوەییە، بەڵام لەوە گرنگتر ئەوەیە جارێکی تریش لە خۆمان بپرسینەوە ئایا کۆنفراس بۆ؟ ئایا بڕیار نیە کۆنفرانس بۆ بەهێزکردنەوەی گۆڕان و چارەسەری کێشەکانی بێت؟ بە مانایەکی تر، کۆنفرانسێک ئەگەر نەبێتە چەتری کۆکردنەوەی سەرجەم هاوڕێیانی ئەمڕۆ و دوێنی، ئەگەر کۆنفرانسێک ئاشتەواییەکی مانادارو راستەقینە بەرقەرار نەکات، بێگومان ئەنجامدانی زیانی گەورەی دەبێت و بە جۆرێک لە پیشاندانی بێمنەتی و بێباکی دەکەوێتەوە بەرامبەر هەمو ئەو گۆڕانخوازانەی کە لە ئێستادا لە دەرەوەی بزوتنەوەکەن و کێشەکان ئاڵۆزتر دەکات. لەم قۆناغەدا گۆڕان و گۆڕانخوازان هەر ئەوانە نین کە بە شێوەی فەرمی لە چوارچێوەی بزوتنەوەکەدا ماونەتەوە، بەڵکو بەشە هەرە گەورەکەی گۆڕانخوازان ئەو دەنگدەر و هەڵسوڕاوانەن کە لە دەرەوەی بزوتنەوەکەن و رەخنەی دروست و جدیان هەیە لە سەر سیاسەت و هەڵوێستی ئێستای بزوتنەوەکەمان و لەمەشدا حەقدارن.
ئازیزان، جیاواز لە حیزبەکانی تر کە کۆنگرە دەکەنە مەراسیم و موناسەبەی هەڵبژاردنی قیادەی حیزب و پیرۆزکردنی، کۆنفرانسی نیشتیمانی لە دەستورو فەرهەنگی گۆڕاندا پرۆسەیەکە، بە پلەی یەکەم تیایدا رۆڵ دەدات بە خواست و بۆچونی جەماوەر و دەنگدەران و پانتاییە هەرە گەورەکەی دنیابینی گۆڕانخوازی. لەم سۆنگەیەوە کۆنفرانس بە بێ رۆڵ و ئامادەیی نوێنەرایەتی و دەنگ و رەنگی راستەقینەی ئەو جەماوەرە دڵسۆزە گۆڕانخوازەی کە لە سەرەتای دروستبونی ئەم جوڵانەوەیە تا ئێستاش، دەبێتە کۆنفرانسی کوژانەوەی دوا تروسکایی هیوا بە بزوتنەوەکەمان و لەڕیشەوە رەسەنایەتی خۆی دایدەبڕێت. ئەمەش هەڵەیەکی گەورەیە و لە ژێر هیچ پاساوێکدا نابێت رێگەی پێبدەین، چونکە بەرپرسیارێتی مێژوویی و ئەخلاقی بە دواوەیە. بۆیە پێویستە پێش هەر بڕیارو هەنگاوێک بە ئاڕاستەی کۆنفرانسدا، بزوتنەوەکە دەست بە سەرپێخستنی پرۆسەیەکی ئاشتەوەیی سەرتاسەری بکات و بێدودڵی لە نزیکەوە هاوڕێ ناڕازیەکان بە سەر بکرێنەوە (بە تایبەت ئەوانەی کە دوای دورکەوتنەوەش لە گۆڕان سەر راستانە بە هەڵوێست و کردار وەک گۆڕانخواز مانەوە)، پێداگرانە داوایان لێبکرێت بگەڕێنەوە بۆ ناو بزوتنەوەکەی خۆیان و شان بدەنەوە بەر ئەو بڕیارو هەنگاو و کارانەی کە بۆ بەهێزکردنەوەی گۆڕان پێویستن و هاوکات بەڵێن و دڵنیاییان پێبدرێت، کە بەڵێ ئیرادەی تەواو هەیە بۆ دوبارە هەستانەوە و کارکردنی بە کۆمەڵ. بۆ بە دیهێنانی ئەو پرۆسەیەش، ئێمە لێرەدا بە پێویستی دەزانین بە کورتی ئەم خاڵانە خوارە بخەینە روو وەک کۆمەڵێک چارەسەری عەمەلی:
١- پێکهێنانی دەستەیەکی کاتی بەهێزو شایستە کە لە ئاستی چاوەڕوانی و ئاڵەنگاریەکانی ئەم قۆناغەدابن، بۆ بەڕێوەبردنی گۆڕان (بۆ مەرحەلەی ئینتیقالی)، لە غیابی رێکخەرو خانەی راپەڕاندندا.
٢- ئەم دەستەیە پێکدێت لەوانەی ئێستا لە ناو گۆڕاندان و بەشیک لە تیمی حوکمەت و ئەوانەش کە لە دەرەوەی گۆڕانن.
٣- ئەم دەستەیە خاوەنی بڕیارو دەسەڵاتی تەواو دەبێت لە سەر هەر پرسێکی پەیوەندیدار بە ژیانی سیاسی و رێکخراوەی بزوتنەوەکەمان لەوانە: پرسی گوتاری سیاسی، چارەنوسی گۆڕان لە حکومەتی هەرێم و حکومەتە خۆجێیەکان و پەرلەمان و بەستنی کۆنفرانسی نیشتیمانی.
٤- کێشەکانی گۆڕان دابەش بکرێن بۆ چەند دۆسییەک و هەر دۆسییەک لە لایەن کۆمیتەیەکەوە کاری تێدا دەکرێ، بە سەرپەرشتی دەستەی بەڕێوەبردنی کاتی بۆ نمونە: (دۆسیەی هەڵبژاردنی ناوخۆیی و کۆنفرانس، دۆسیەی پێداچونەوە بە دەستور و پەیڕەوی ناوخۆ، دۆسیەی پێداچونەوە بە گوتاری سیاسی و مێدیایی، دۆسیەی دارایی، دۆسیەی دروستکردنەوەی پەیوەندی لە گەڵ هێزە ئۆپۆزسیۆنەکان…هتد)
٥- لە ماوەیەی رابردودا لە لایەن هەڵسوڕاوان و دۆستانی گۆڕانەوە دەیان پرۆژە و پێشنیاز پێشکەشی بزوتنەوەکەمان کراوە، بە سودوەرگرتن لەو پێشنیازانەش دەکرێ نەخشە رێگایەکی ورد دابنرێ، لە پاڵ ئەمەدا دەبێ کاتبەندی تەواو بۆ هەنگاوەکان دابنرێت (بۆ نمونە ٦ مانگ) و دڵنییای تەوا بە رای گشتی گۆڕانخوازان بدرێت کە هەمو هەنگاوەکان لە کاتی خۆیدا جێبەجێ دەکرێن.
٦- لە پاڵ ئەو خاڵانەی سەرەوە دەمانەوێ ئێمەی کوڕانی نەوشیروان مستەفا وەک دوو هەڵسوڕاوی بزوتنەوەی گۆڕان ئەوەش بڵێین: بە هەمو شێوەیەک هاوکارو پشتیوان دەبین بۆ سەرخستنی ئەو هەنگاوانەی باسمان کرد، بە دیاریکراویش لە سەر پرسی گردەکە جارێکی تر دڵنیایی دەدەینەوە کە تاکە بژارد ەو خواستی باوکمان ئەوە بوو کە گردی زەرگەتە ماڵ و قەڵای گۆڕانخوازان و گۆڕانێک دەبێت کە لە بەرەی گەلدا بمێنێتەوە، جێگەیەک بێت بۆ خزمەتی گشتی و بەرگریکردن لە چاکەی گشتی، لە پاڵ ئەوەشدا خەونەکانی باوکمان ئەهێنینە دی بە دامەزراندنی ناوەندێکی رۆشنبیری بۆ پێگەیاندن و خزمەتکردن بە نەوەکانی داهاتوو. لە کۆتایشدا ئەڵێن، ئێمە قسەی دڵی زۆرینەی خەمخۆرانی گۆڕان و خۆمان کرد، ئێوەش ئازاد لەوەی کە چ هەنگاوێک هەڵئەگرن.
لە گەڵ رێز و حورمەتی بێ پایانمان،
نما نەوشیروان
چیا نەوشیروان
٢٩ ی ١ ی ٢٠٢٣