هه‌رێم و شكاندنی كۆتی حیزبایه‌تی ته‌قلیدی!

لەلایەن ستاندار Posted on 800 جار بینراوە

ره‌حمان خانی

عمار حه‌كیم له‌ جیاتی ده‌ركردنی ئه‌وانه‌ی له‌گه‌ڵیان ناكۆكه‌، حیزبه‌كه‌ی به‌جێ هێشت ، ئه‌وانه‌ی مه‌به‌ستی بو، له‌گه‌ڵی چون ، به‌ تایبه‌ت گه‌نجه‌كان ! كه‌واته‌ ناو و مێژو و میرات و پاشخانی سیاسی پیرۆز نیه‌، گرێبه‌ستی هه‌تاهه‌تایی بێت .حه‌كیمی كوڕ ره‌مزی بنه‌ماڵه‌ی حه‌كیمی دایه‌وه‌ ده‌ست ‌ دامه‌زرێنه‌رو سیاسیه‌ پیره‌كان و خۆی ماڵئاوایی كرد ، ره‌وتێكی به‌ناوی بزوتنه‌وه‌ی حیكمه‌ی نیشتمانی (NWM)، بێ پاشگری ئیسلامی دامه‌زراند‌ (هه‌بون له‌ حیزبه‌ ئیسلامیه‌كانی لای خۆشمان ده‌یانویست ئه‌م پاشگره‌ له‌ خۆیان داماڵن)!

به‌مه‌ش له‌ كۆی 29 په‌رله‌مانتار 25 ی له‌گه‌ڵ خۆی برد. له‌ حیزبه‌ دێرینه‌ ئۆپۆزسیۆنه‌كانی عێراق (ویفاقی نیشتمانی) و (ده‌عوه‌)و(ئیسلامی) ش په‌رتبونی ئاشتیانه‌ی له‌و شێوه‌یه‌ی هه‌بوه‌ ، به‌ جۆرێك هه‌ندێكیان وه‌كو لیست وره‌وتی هه‌ڵبژاردن گۆڕانكاری خێرایان له‌ ناو و پێكهاته‌و دروشمدا به‌سه‌ردا هاتوه‌، كه‌ له‌ دنیای سه‌رده‌مدا باوه‌. ئه‌و ئه‌زمونه‌ پێشتر له‌ سه‌ر ئاستی به‌رپرسی دوه‌می حیزب له‌ هه‌رێمی كوردستان ،( نه‌وشیروان مسته‌فا) تاقی كرده‌وه‌و سه‌ركه‌وتنی به‌ده‌ست هێنا .. له‌ وڵاته‌ دیموكراته‌كان و به‌تایبه‌ت لای حیزبه‌ ئیسرائیلی وئه‌وروپیه‌كان، ئه‌م دیارده‌یه‌ زۆر بڵاوه‌ ، له‌ توركیای پێشئه‌ردۆگان، ناوگۆڕینی حیزب زۆرجار له‌ ژێر گوشاری سیاسی وده‌ستوریدا رویداوه‌ ، به‌ڵام به‌ هه‌مان ئاراسته‌و كاراكته‌ره‌ سیاسیه‌كانی پێشو!

وا هه‌ڵبژاردنی په‌رله‌مان له‌ عێراق و هه‌رێم، نزیك ده‌بێته‌وه‌ ،له‌ كاتێكدا ناڕونی چاره‌نوس و دزی وگه‌نده‌ڵی فره‌ره‌هه‌ند و سیاسه‌تی خه‌ڵكگوشین؛ زه‌مینه‌ی رێكخستن و پێشه‌نگایه‌تی ناڕه‌زایی وای ره‌خساندوه‌ ؛ دور نیه ‌، له‌ روی تێپه‌ڕاندنی ته‌قلیدی حیزبایه‌تی و مشه‌خۆری سیاسیه‌وه‌ ، له‌ ڕوی گه‌نجاندنه‌وه‌ ، له‌ هه‌رێمیش هه‌ندێ كۆت و به‌ند بشكێنرێ و حاڵه‌تی هاوشێوه‌ یا شێوازی تر له‌ حیزب و ره‌وت و به‌ره‌ی هه‌ڵبژاردن بێته‌ كایه‌وه‌ ، بۆیه‌ هه‌رێم پێویستی به‌ نه‌فه‌سی سیاسی به‌غدایانه وكه‌شسازی مه‌ده‌نیانه‌یه‌ ‌، بۆ ئه‌وه‌ی به‌ ئاشتی پرۆسه‌ی دیموكراسی له‌و پاشاگه‌ردانی سیاسیه‌‌‌ رزگار بكات ،كه‌ به‌داخه‌وه‌ ته‌مو تانه‌ی خستۆته‌ سه‌ر ڕه‌وایه‌تی خه‌بات و مافی ئه‌م میله‌ته‌په‌رته‌وازه‌یه‌ له‌ ناوخۆو ده‌ره‌وه‌ ، ئه‌وه‌ش به‌رله‌ هه‌ر هه‌نگاوێك پێویستی به‌ چاكسازی ریشه‌یی له‌ ته‌واوی جومگه‌كان، ئاشتبونه‌وه‌ی گشتی و ستراتیجی نیشتمانیه‌ ، كه‌ ته‌نها له‌ ناو هۆڵی په‌رله‌مانی كوردستاندا ؛ ده‌خه‌مڵێ و ڕه‌وڕه‌وه‌ی پرۆسه‌ی سیاسی ویاسایی راست ودروست بۆ پێشه‌وه‌ ده‌بات ، دور له‌ رێگری و چه‌كسالاری و پاوانخوازی ! بزانین هه‌رێم چۆن ئه‌م ئه‌زمونه‌ تێده‌په‌ڕێنێ؟

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.