ستاندەر
لەچەند رۆژی رابردوو سەرکردەی حیزبێکی ئیسلامی کە ناوەکەی لای ستاندەر پارێزراوە سەردانی بارزانی کردوە و، لیستێک داواکاری لەگەڵ خۆی بردوە بۆ ئەوەی ڕەزامەندی پیشان بدرێت لەسەری.
سەرچاوەکە بەستاندەری ڕاگەیاند لە کۆبونەوەکە سەرۆکی حیزبە ئیسلامیەکە رایگەیاندوە بەھەمو شێوەیەک پاڵپشتی ریفراندۆم دەکەین و لەگەڵیداینە.
ھەر لەدانیشتنەکە ئەو سەرکردەی ئیسلامیە لیستێک داواکاری ئاراستەی بارزانی کردوە کە پێکھاتبو لەداواکردنی پێدانی زەوی و پارە بۆ دروستکردنی بارەگا و مۆڵەت ھەروەھا دامەزراندن و خانەنشینی، وەک چۆن بۆ حیزبی سۆسیالیست کراوە کە ٣٠٠ پێشمەرگەیان بۆ دامەزرێنراوە و ٢٠٠ کەسیش خانەنشین.
لە وەڵامدا بارزانی سوپاسی پشتگیری کردون بۆ ریفراندۆم و رەزامەندی لەسەر سەرجەم داواکاریەکان دەربڕیوە جگە لەو خاڵەی کە پەیوەندی بە دامەزراندنی پێشمەرگە ھەیە ڕایگەیاندوە لەو دۆخە چەکدارکردنی حیزبی ئیسلامی خراپ لەسەرمان دەکەوێت.
جێ ی باسە لەگەڵ دەستپێکی پرسی ریفراندۆم زۆرینەی ئەو حیزبانەی پاڵپشتی ریفراندۆم دەکەن ئیمتیازی جۆراوجۆریان پێدەدرێت بەتایبەت لەنێو ئیسلامیەکان ئەو حیزبانەی لەگەڵ ریفراندۆمن بودجە و ھاوکاری دارایی تەواویان پێشکەش دەکرێت بەپێچەوانەی ئەوانەی کە لەگەڵ ریفراندۆم نین بەو شێوەیە و داوادەکەن لەپەرلەمان بریاری لەسەر بدرێت.