“بەغدا، ئەو دڕکەی ھەرگیز ترێ ناگرێت”

لەلایەن ستاندار Posted on 540 جار بینراوە

زیاد ڕەشاد قادر

ھەموومان دەزانین لە ماوەی پتر لە چارەگە سەدەیەک حوکمڕانی، دەسەڵاتی سیاسی کوردستان نەک ھەر نەیتوانیوە ژیانێکی خۆشگوزەران دابین و حوکمێکی ڕەشید پەیڕەو بکات، بەڵکو لە مشەخۆری و نابەرابەری و بەھەدەردانی سامانی گشتی، گەیشتووەتە ئاستێکی مەترسیدار و چی بکرێت و چی بگوترێت، نابێتە پاساوی ئەو ھەموو بێسەروبەری و ناڕۆشنی و ناشەفافیەتەی لەم ھەرێمەدا دەگوزەرێت، وەک دەگوترێت وەھا نەدڕاوە بتواندرێ بە ئاسانی پینە بکرێت.
بەڵام ئەمە ھەرگیز لەجێگەی خۆیدا نییە، بکرێتە بیانووی ستایشکردنی سیستمی ئیداری و فەرمانڕەوایی حکومەتی ناوەندی و بە گوڵ پێشوازی لە بڕیار و فەرمانەکانی ئاغای عەبادی بکرێت لە کوردستان، لەبەرئەوەی عێراقی تازە، یا بەغدای دوای (٢٠٠٣)، بە ھەموو کایە و جومگە و نێوەند و دامەزراوەکانییەوە، یەکێکە لەو وڵاتە سەیرانەی سەر ئەم ھەسارەیە، قەت ئەو مەئوا سەقامگیر و جێگە ئومێدە نەبووە، منی کورد شەرم لەوە نەکەم، کە ھاووڵاتیی سەر ئەو پارچە زەمینەم. ھیچ کات بەغدا نەبووەتە وڵاتێکی موئەسەساتی و لەسەر بنچینەی یاسا و دەستوور و ھاووڵاتیبوون مامەڵە لەگەڵ گەلانی وڵاتەکەی بکات و ڕەچاوی مافە سەرەتاییەکانی مرۆڤ بکات، ئازادی و خۆشگوزەرانی بۆ خەڵکەکەی لە دروشمەوە بگوازێتەوە بۆ کردار. ھەر بۆ نموونە ئەو کاتەی کە نە شەڕی داعش ھەبوو و نە پرسی ڕیفراندۆم لە ئارادا بوو و نە ھەرێم نەوتی دەفرۆشت، بەغدا ئامادە نەبوو بەشە بودجەی ھەرێم وەکوو خۆی بنێرێت کە ١٧% بوو.
ئەگەر عێراقی پێش (٢٠٠٣) عێراقی سەرکوتکردن و داپڵۆسین و حیزبی قائید و قائیدی زەرورە و کۆماری ترس و تۆقاندن و سێدارە… بووبێ، ئەوا عێراقی دوای (٢٠٠٣) بەگوێرەی ڕاپۆرتی دەزگا و نێوەندە فەرمی و نافەرمییە نێودەوڵەتی و ناوچەییەکان، لە ڕێزی پێشەوەی دەوڵەتە ھەرە گەندەڵەکانی دونیایە، ھەروەھا بەپێی چەندین داتا و ئامار، عێراقی تازە لە ڕووی خراپی ژینگە و پیسی شارەکان و ناجێگیری دۆخی ئەمنی و بەربادی لەڕووی ئابووری و بەرخۆری و بێ بەرھەمی، لە یەکەمەکانی وڵاتانی دونیایە. ھەروەھا کێشەی کورتھێنانی ساڵانەی بودجە و ساڵ بە ساڵ کەڵەکەبوونی زێتری قەرزی وڵاتان، ئەگەر ئێستاش کارکردی ڕاستەوخۆی نەکردبێتە سەر گوزەرانی خەڵکەکەی، ئەوا بێ شک دوای چەند ساڵێکی دی، زۆر بە ڕۆشنی، ماک و شوێنەوارە خراپەکانی ئەو دۆخە ترسناکە دەردەکەوێت. ئەمە جگە لەوەی نەزعەی مەزھەبگەرایی و دابەشکردنی پۆستەکانی نێوەندی دەسەڵات، لەسەر بنچینەی تائیفی و زیادبوونی میلیشای چەکدار و سوپای نانیزامی، لەباتی پێشخستن، ڕۆژ بە ڕۆژ ئەم وڵاتە دەگەڕێنێتەوە دواوە.
لەبەرئەوە بەکورتی وەک چۆن عێراقی پێش (٢٠٠٣)، ھەرگیز عێراقێک نەبووە منی کورد شانازیی پێوە بکەم و بە وڵاتی ڕاستەقینەی خۆمی بزانم، بە ھەمان شێوە عێراقی تازە، ھەر دڕکەکەی جارانە، بەربادیی ئەزموونی ھەرێم و بیماریی باخی کوردستان، ھەرگیز وام لێناکات پێم وابێ ئەو دڕکەی بەغدا ڕۆژێ لە ڕۆژان ترێ دەگرێت!

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.