ستاندەر
دوای ئەو کارەساتەی گروپی تیرۆرستی داعش بەر لە چوار ساڵ بەسەر شەنگالا هێنای لەلایەن سەرۆکی هەرێمی ئەوسا و وەزارەتی پێشمەرگە لیژنەیەک پێکهات بۆ لێکۆڵینەوە لەگەڵ ئەو فەرماندە سەربازیانەی هێزی پێشمەرگە کە شەنگال یان بەبێ بەرگری بەجێهێشت و بەوهۆیەشەوە ژمارەیەکی زۆری چەک و ئەسلیحە کەوتە دەست ئەو گروپە تیرۆرستییەو ئەو کارەساتەی شەنگالی لێکەوتەوە.
جێگای باسە تاوەکو ئێستا ئەو لێژنەیە هیچ ئەنجامێکی نەبووە ئەوەش دەگەڕێتەوە بۆ ئامادەنەبوونی زۆرینەی ئەو فەرماندە سەربازیانەی هێزی پێشمەرگە لەبەردەم لێژنەکە و دادگا.
لەلایەکی ترەوە ڕاپۆرتی وەزارەتی دەرەوەی بەریتانیا و هەندێ ڕاپۆرتی نێودەوڵەتی تر باسیان لەوەکردووە کە هێزی پێشمەرگە بەبێ هیچ جۆرە بەرگریەک شەنگال و ئەو ناوچانەی چۆڵکردووە. باس لەوەش کراوە ئەوانەی بەرگریان لەو ناوچەیە کرد تەنها هەندێ مەفرەزەی هێزەکانی یەپەژەی ڕۆژئاوا بوون.