ستاندەر
شەوی ڕابردوو لەگوندی کانی قڕژاڵەی نزیک هەولێر کۆگایەکی چەک و تەقەمەنی تەقییەوە و تاوەکو ئێستاش زەرەرو زیانەکانی نەزانراوە.
لیوا قارەمان کەمال جێگری سەرۆکایەتی ئەڕکان بۆ ئۆپەڕاسیۆنەکان لەوەزارەتی پێشمەرگە لەگفتوگۆیەکی لەگەڵ کەناڵی ڕوداوو کۆمەڵێک زانیاری ئاشکراکرد وتی “ئێمە ئاگامان لەسوتان و زەرەر و زیان و هۆکارەکانی تەقینەوەی ئەو کۆگایانە نییە”. ڕاشیگەیاند کە “ئەو کۆگایانە سەربە زێرەڤانی و یەکەکانی ۷۰ و ٨۰ ن و هیچ هەماهەنگییەکیان لەگەڵ وەزارەتی پێشمەرگە نییە”. ئەوە یەکەم جارە ئەفسەرێکی وەزارەتی پێشمەرگە دان بەو ڕاستیە دابنێت کە زێرەڤانی و یەکەکانی ۷۰ و ٨۰ لەژێر فەرمانی وەزارەتی پێشمەرگە نین.
تەقینەوەکەی شەوی ڕابردوو لەکاتێکدایە لە ماوەی ڕابردوو چەندین کۆگای چەک و تەقەمەنی لە شارو شارۆچکەکانی کوردستان تەقیونەتەوە تاوەکو ئێستاش هۆکاری تەقینەوەکان دیار نییە. ئەو بێئاگاییەی وەزارەتی پێشمەرگە سەلمێنەری ئەوەیە کەوا دامەزراوەکانی بەرگری هەرێم هەماهەنگیەکی وایان لەنێوان نییە و لەفەوزایەکی گەورەدان.