ستاندەر
سەبارەت بە داخستنی خوێندنگە ئیسلامییەکان، فراکسیۆنی کۆمەڵی ئیسلامی لە پەرلەمانی کوردستان رەخنە لە حکومەتی هەرێم دەگرێت و داوای هەڵوەشاندنەوەی بریارەکە دەکات.
دەقی راگەیەنراوەکە:
بەناوی خوای بەخشندەی میھرەبان
بە بڕیاری داخستنی خوێندنگە ئیسلامییەکان لەلایەن وەزارەتی خوێندنی باڵاوە، ناڕازی و نیگەرانین و بە ستەمێکی دیکەی دەزانین کە ئەم دەسەڵاتە عەلمانییەی ھەرێم ھەر ڕۆژە و لەژێر پاساوێکدا بۆسەر دامەزراوە ئیسلامییەکانی ئەم ھەرێمە ئەنجامی دەدات .
لەبری گەشپێدان و داڕشتنی پرۆگرامی سەردەمییانەی پێشکەوتوو بۆ ئەو خوێندنگایانە، لەبری گرنگیپێدانیان و کردنیان بە ناوەندێک بۆ پەروەردەکردنی خوێنکاری تێگەیشتوو لە ئیسلام کە بەرەو توندڕەویی نەڕوات، بەداخەوە دەسەڵاتی سیاسیی ھەرێم خۆی بۆتە بەشێک لە بەلاڕێدابردنی بیری گەنجان و خوێندکاران و دروستکردنی کۆسپ و لەمپەر لەبەردەم خوێندنی ئیسلامیی و دامەزراوە ئیسلامییەکانی دیکەدا .
ئێمە لە فراکسیۆنی کۆمەڵ لە پەرلەمانی کوردستان تەواوی بڕیارەکەی وەزارەتی خوێندنی باڵا ڕەتدەکەینەوە و پێمانوایە بەتایبەتی بۆ ئێستا کە حکومەت خۆی کاربەڕێکەرە، ناتوانێ و بۆی نیە بڕیارێکی وا ھەستیار بدا و پێویستە بە زوترین کات ھەڵبوەشێتەوە .
فراکسیۆنی کۆمەڵ لە پەرلەمانی کوردستان
١٨ ی ١١ ی ٢٠١٨