دابان محه‌مه‌د/ئه‌ندامى په‌رله‌مانى كوردستان
لە دوای دەستکەوتنی چەندین بەڵگە و زانیاری لەسەر دانانی پێوەری ئاوی ماڵان و خوێندنەوەی پێوەرەکان، لیژنەیەکی پەرلەمانی لەسەر ئەو پرسە پێکھێنرا، ئەمڕۆ سەردانی وەزارەتی شارەوانیمان کرد و لەگەڵ وەزیر و برکاری وەزیر و … ھتد، تەواوی کێشەکانی پێوەری ئاو لە دانانیەوە تا دەگاتە خوێندنەوەی پێوەرەکان، خرایە ڕوو، کە کۆمپانیاکانی (( ئاراس، جنون، گرنگ، ختیب علمی، ئۆرانۆس))، ئەنجامیان داوە و ئەنجامی دەدەن، نکۆڵی لە ھیچ یەکێک لەو کەموکوڕی و زانیاریانە نەکرا، کە لە ڕابردودا ھەم بەندە خستیە ڕوو، ھەم ھاوڵاتیانیش پشتیوان بون لە ئاشکراکردنی دەیان کەموکوڕی و گەندەڵی لەم پرسەدا.
یەکەم: ئەم کابینەیە و وەزیری شارەوانی چەند ڕۆژێکی ماوە، بەڵام پرسی پێوەرەکانی ئاو لە وەزارەت و کەیسی ھەر پێنج کۆمپانیاکە، لە ڕابردو و ئێستاو و داھاتودا کراوەیە لە بەردەستماندا و دەستی لێ ھەڵناگرین
دووەم: لە ئێستادا ھاوڵاتی ناچار دەکرێت بە بەستنی پێوەری ئاو، ئەویش بە بڕیارێکی ئەنجومەنی شورا، ڕای گشتی و ھاوڵاتیان ئاگادار دەکەینەوە، کە ئەنجومەنی شورا ئەنجومەنێکی ڕاوێژکارییە و بڕیارەکانی ئیلزامی نین.
سێیەم: ھەزاران کەم و کوڕی و کێشە، لە پێوەر و پسولەی پێوەری ئاودا ھەیە بە جۆرێک زیاتر لە ھەزار کەس، سەرو ٥ ملیۆن دینار پارەی ئاوی بۆ مانگێک بۆ ھاتوەتەوە، سەدان کەس لە ٢ ملیۆن زیاتر و دەیان ھەزاریش ١ ملیۆن دینار بەرە و ژور.
چوارەم: دۆسێیەی کۆمپانیاکانی (( ئاراس، جنون)) کە کاری دانانی پێوەریان کردوە، کۆمپانیاکانی(( ختیب علمی، گرنگ، ئۆرانۆس)) کە کاری خوێندنەوەی پێوەرەکان دەکەن (( تەندەرەکانیان، گرێبەستەکانیان، ئیش و کارەکانیان لە پێناو بەدەستھێنان پرۆژەکە و بەڵگە و زانیارییەکان )) کراوەن لەگەڵ وەزارەتی شارەوانی و بەڕێوەبەرایەتیەکانی ئاو و بەڕێوەبەرایەتی گشتی ئاو و ئاوەڕۆ.
پێنجەم: ئەم کێشەیە پەیوەندی بە ماڵ بە ماڵ و تاک بە تاکی ئەم ھەرێمەوە ھەیە، چاودێری و بەدواداچون و لێپرسینەوە، بەردوامی ھەیە تا ئەو کاتەی پرۆسەکە لە بەرژەوەندی ھاوڵاتیاندا دەشکێتەوە (( وەک پێشتر پارەی ئاو دەدرا)) یان ئەوەی کۆی پرۆسەی پێوەری ئاو ڕادەگیرێت یان ھەڵدەوەشێتەوە.