بروا ستار
بەر لە هەر شتێک دادگا لە سیستەمی ئەمڕۆی زۆرینەی دەوڵەتاندا بریتییە لە دەزگایەکی تەواو بێلایەن لە دەزگای پەرلەمان و جێبەجێکردن، تایبەتمەندی ئەم دەزگایە بریتییە لە بێلایەنی و سەربەخۆیی کارکردن، بەو پێیەی کارکردنی ئەم دەزگایە لە پێناو جێبەجێکردنی یاسا و لێپێچینەوەی سەرپێچی کردن لە یاسایە، بۆ نموونە لە وڵاتێکی وەکو کۆریای باشووردا سەرۆک دەخرێتە بەردەم دادگا و لێپێچینەوە و موحاسەبەی لەگەڵدا دەکرێت و سزای کردارە نا یاساییەکانی وەردەگرێت، بەڵام هاوکاتیش لە وڵاتێکی وەک ئەوەی لەمەڕ خۆمان دادگا دەخرێتە بەردەم ئاخوڕی حیزب و هەر چۆنیکیشیان لیی بوێت ئاوا هەڵیدەسوڕێنن.
تۆ سەیری ئەم مەهزەلەیەی مەملکەتە کەس بەکەس نیەکەی خۆمان بکە دەزگایەکی وەک دژە تیرۆر کە سەر بە پارتی دەستەڵاتدارە و فڕی بەسەر بێلایەنییەوە نییە و تەنها کارەکانیشی لە سنوورێکدا دەخولێتەوە هەڵدەستێ بە بێ فەرمانی دادوەر و بەبێ لێکۆڵینەوەی داواکاری گشتی، دەوری هەمووی دەبینێت و هەر خۆی نووسراوی داواکاری گشتی هەڵدەهێنێت و هەر خۆشی دەبێتە لایەنی جێبەجێکار، تۆ واز لەوە بێنە ئاخر کارەسات لەوە زیاتر هەیە، کەناڵێک کە کاری گواستنەوەی هەواڵ و زانیاری و ڕووداوەکانە دەبێت بە دەزگای دادوەری و ڕۆڵی یەک دادگای تاوانکاری دەبینێت، جا لە هەمووی سەیروسەمەرەتر ئەوەیە، خەڵک لە ئێستادا تێکڕا لە رووداوێکی وەهادا چاوەڕێی کوردستان٢٤ە بۆ ئەوەی دانپیدانان و دادگایی و شتی تری تاوانکاری ببینێت وەک ئەوەی ئەمڕۆ لە کەناڵی کوردستان ٢٤ی سەرۆکی حکومەتی هەرێمی کوردستان-عێراق بینرا، ئاخر واز لەوە بێنە کە راگەیاندن مۆڕاڵێكی تایبەتی هەیە لەم پرسانە ئەویش دەرنەخستنی چڕوچاوی خاس و خراوە، کەچی بێگوێدانە هێچ بنەما و پڕەنسیپ و مۆڕاڵیک کەناڵەکەی سەرۆکی حکومەت پێی پێوە دەنێت و چونکە ئیتر خاوەنەکەیان بووە بە سەرۆکی حکومەت و هەر خۆیان دەستەڵاتدارن و کەس نییە بڵێ لەل، لە کوێی دونیا پێش تاوانبارکردن سوکت دەکەن و دەتخەنە بەردەم رای گشتی و اعترافت پێ دەکەن ، ئەی ئەگەر وایە ڕۆڵی دادگا و دادوەر چییە ؟!
بۆ دەبێت لە قەرنی ٢١دا بژین و ئەم وڵاتە هەر وەک قەرنی ١٦خۆی پێناس بکات، ئاخر کەسێ نییە لەم وڵاتە یان هەیە و بووە بە دەستکەلای پارتخێڵەکان لەپێناوی نانێکی شەرمەزاری؟!.