په‌یكار عوسمان
– تاوان لە دەروونی نەخۆشەوە ئەکرێ، هەموو مرۆڤێکیش لەناو دوو دنیاو دوو دەرووندایە: دنیای کۆمەڵایەتی و دەروونی دەستەجەمعی. ژیانی تایبەت و دەروونی فەردیی.
دەروونی دەستەجەمعی ئێمە، بە دنیایەك هۆکاری سیاسی ئابووری کۆمەڵایەتی.. هیلاکەو تا ئەوپەڕی نەخۆشیی، نەخۆشەو ئەگەر کارگەیەكبێت، کارگەی بەرهەمهێنانی تاوانەو هیچی تر.
– ئەوەی بەدەستمانەوە ماوەتەوە، بۆئەوەی ئینسانبین یان وەحش، تەنیا دەروونە فەردییەكەیە.
ئەم دەروونەش جگە لەوەی کێشەی تایبەتی خۆی هەیە، بەردەوام لەبەردەم هێرش و داگیرکاریی دەروونەکەی تریشدایە!
– بۆیە کاتێ دەروونی جەمع سەلامەتە، ئەگەرێکی زۆرە، ئەم سەلامەتییە دەروونی تاکیش داگیربکاو تاوان کەم ببێتەوە.
بەڵام تاوان هەر ئەمێنێ، چونکە وەك وتمان دەروونی فەردیی تاکیش هەیەو ئەویش نەخۆشیی و کێشەی تایبەتی خۆی هەیە، کە ئەشێ سەربکێشێ بۆ تاوان.
– بەڵام کاتێ دەروونی جەمع ناساغە، ئیتر ئەگەرێکی زۆرە، ئەم ناساغییە بگوازرێتەوە بۆ دەروونی فەردو ئەویش تووشی ناساغیی ببێت. ئیتر تاوانیش وەکو خۆڵ زۆر ئەبێت!
بەڵام تاواننەکردنیش هەر هەیە، چونکە دەروونی فەرد، ئەکرێ ساغبێ و بەسەر نەخۆشییە فەردی و جەماعییەکانیشدا سەرکەوێت.
– لە کۆبوونەوەی (دەروونێکی ناساغ و چەكیشدا) ئیتر تاوان ئەگەرێکی حەتمییەو ئێمە لەبەردەم تاوانداین چ ئەو کاتەی کە ڕووئەداو چ ئەوکاتەش کە هێشتا ڕووینەداوە!
(دەروونی ناساغ و چەك) یەعنی تاوان. بەوجودی ئەو دووانە، ئیتر هەموو ساتێك ئەگەری تاوانێکەو هەموو مرۆڤێك کەرەستەی وەحشێك یان قوربانییەکەو کۆمەڵگاش مەسرەحێکی گەورەی جەریمەیە.
– چاککردنەوەی دەروونی کۆمەڵگا لە نەخۆشییە زۆرەکانی، پرۆسەیەکی هەمەلایەنەی درێژخایەنە. پەیوەندی بە پەروەردەو عەداڵەت و سەروەری یاساو ئاشتیی و ئەم شتانەوە هەیە.. بەڵام کۆکردنەوەی چەك، کارێکی فریاگوزاریی خێرایەو ئەبێ هەرئێستا بۆ نەخۆشەکە بکرێ!
وەلێ ئایا دەسەڵاتێکی چەکسەنتەرو ئەحزابێکی میلیشیایی و نوخبەیەکی عەقڵچەك، ئەتوانن کۆمەڵگایەکی مەدەنی بێ چەك دروستبکەن؟؟
بێگومان نەخێر، دەی مادام نەخێر، کەواتە چاوەڕێکردنی سەرەوە، چاوەڕوانییەکی بێهودەو ناکامەو ئەبێ کارەکە لە خوارەوە خۆمان بیکەین!
– جا وەکچۆن بەرامبەر هێرشی تورکیا، هەڵوێستی لاوازی سەرەوەمان تێپەڕاندووەو لەخوارەوە خۆمان هاتووینەتە مەیدان.
گرنگە بەرامبەر (چەك)یش وەکو کاڵایەکی کوردی و (تلیاك)یش وەکو کاڵایەکی ئێرانی، هەمان شت بکەین و بایکۆتەکە بکەین بە سێ بایکۆت، چونکە ژیانمان لەبەردەم سێ مەترسیدایە! (کاڵای تورکی و چەكی کوردی و تلیاکی ئێرانی).
– بایکۆتی کاڵای تورکی، هەڵمەتێکی هۆشیارانەو بەرگرییەکی مەدەنی تەواو شایستەو گونجاوە. چونکە کاڵای تورکی بازاڕی داگیرکردوین و لەوێوە بەرهەم و بازووی خۆماڵی شکاندوە. شاشەشی داگیرکردوین و لەوێوە عەقڵیشی کۆنترۆڵکردوین.
یەعنی (هێزی بیرو بازوو) هەردوکی تێکشکاندوین. ئینسانی بەرخۆری بێ بیرو بازووش، کەرەستەی خاوی تاوانە.
بەڵام چەك و تلیاکیش هەر هەمان کارئەکەن!
– تلیاكیش بیرو بازوومان لێئەسەنێ، چونکە مرۆڤی ئالوودە، هەموو بیرو هۆشی لای پەیداکردنی مادەی هۆشبەرەو کاتێکیش پەیدای ئەکات، مادەکە هۆشی ئەکات. یەعنی لە هەردو بارەکەدا ئەو هۆشی لای خۆی نیە! لەولاشەوە مادەکە جەستەو بازووی تێکئەشکێنێ.
– چەکیش جگە لەوەی جەستەیی و فیزیکیی لەناومان ئەبات، خراپترین بەدیلی عەقڵیشەو ئەو کاتانەی کە چەك قسەئەکات، ڕێك ئەو کاتەیە کە دەمی عەقڵ داخراوە!
چەك نەبێت، عەقڵ هەمیشە ئەتخاتە بەردەم چەن ئەگەرێك کە ئەشێ دوورترین و ئەخیر ئەگەریان توندوتیژبێت.
بەڵام چەك هەبێت، پێشئەوەی بەرامبەری پێبکوژیت، عەقڵی خۆت و فرەئەگەریی پێئەکوژیت!
بەوەی کە ڕاستەوخۆ ئەتخاتە بەردەم تاقە ئەگەرێكی توندوتیژو ئینسانیش بە سروشتە غەریزییەکەی، بەرامبەر “مەنتقی هێز” لاوازەو تەسلیمی ئەو ئەگەرە ئەبێ و ئیتر بوار نامێنێ بۆ بیرکردنەوەو ئەگەری تر.
– هەمیشە وتوومەو دووبارەشی ئەکەمەوە، (بە چەکەوە بیرناکرێتەوە)!
ئێمە ئەبێ لەشوێنێکی مێژوودا چەك دانێین، لەبەر چاوی کاڵی دوژمن نا، بەڵکو لەبەر خۆمان، بۆئەوەی بتوانین بیربکەینەوە!
ئا لێرەشەوە باش لە ئاپۆ تێئەگەم، کە چەنجارێك داوای چەكدانانی کردووە! لەڕاستیدا ئەو داوای تەسلیمبوون ناکات. بەڵکو لەبەرامبەر چەکداناندا داوای عەقڵهەڵگرتن ئەکات، کە دووەمیان بەرگری ڕاستەقینەی پێئەکرێ.
ئینجا نا بۆ کاڵای (تورکی و ئێرانی و کوردی) هەرسێکی پێکەوە!
بەڵێ بۆ بایکۆتی (چەك و تلیاك)یش لەپاڵ کاڵای تورکیدا.