مەلا فرمان
دوەم کۆسپە گەورەکەی بەردەم پرس و خۆشگوزەرانی کورد
رابردو دەریخستوە و سەلماندٶتی دەسەڵاتی حیزب و سەرکردەکانی باشور لە شاخ و لە شار:
１- هۆکاری چاندنی تۆوی دوبەرەکی و شەڕی ناوخۆن.
２- بۆ بە گژاچونەوەی یەکتر لە بون بە کەواسوری بەر لەشکری دوژمن سڵیان نەکردۆتەوە.
３- نەزان و کورتبین و خۆشباوەڕن.
４- لە دەمکوتکردن و سەرنگومکردنی دژە خۆماڵیەکان سێودویان لێنەکردوە.
５- بەرامبەر بە پارچەکانی تری کوردستان کەموزۆر سیاسەتی ناحەزانەیان هەبوە.
６- لە حوکمڕانی شاریشدا لە بواری بازرگانی و خۆدەوڵەمەندکردن و قۆرغکردنی بازاڕ و میدیا بە تەواوی جێدەستیان دیارە.
ئەم بارودۆخەی ئێستای کوردستانی عێراق :
لە هەرێم : لە روی خزمەتگوزاری وەک ئاو ، کارەبا، رێگاوبان ( دوای ٢٨ ساڵ پایتەخت بە جادەی خێرا بە سلیمانیەوە نەبەستراوە)، ئازادی رادەربرین و کۆسپخستنە بەر کاری میدیا و رۆژنامەگەری ئازاد.
لە کەرکوک : لە روی پرسی خاک و نەتەوە و پیکەوە ژیان.
دەرهاویشتەی ئەو راستیانەی سەرەوەن و بەدیهیەکن و سەلمێندراون.
ئێستا
１- رۆژئاوا لە هەموانەوە دیارە، تورکیا لە دونیا ناشرین بوە، کەچی ئەم دەسەڵاتە حیزبیەی ئێستای هەریم تەواوی پیرۆزیەکانی پرسی نەتەوە و نیشتمان دەخەنە ژێر پێوە و دەجنە خزمەتی سوڵتانی عوسمانی، ئەو سوڵتانەی بە چاوی خێڵ و سەرۆک عەشیرەت لە خودی ئەم دەسەڵاتە دەڕوانێ.
２- دوێنێ دژ بە هەمو ئاراستەکان داکۆکیان لە سیاسەتی ئابوری سەربەخۆ دەکرد، بەمەش گورزی کوشندەیان بەر ژیان و گوزەرانی خەڵک گەیاند. ئەمڕۆش ١٨٠ پلە بایان داوەتەوە.
３- نازاندرێ ئیمەی کورد لە باشور لەگەڵ کێین ، ئەنقەرە یان بەغدا.
４- پکک، بەبەرچاوی هەموانەوە چەندین ساڵە دەستی گفتوگۆ و ئاشتی دریژ دەکات، بۆیە نەدەبو دەسەڵاتدارانی باشور وەک تورکیا بیر بکەنەوە، بەڵکە دەبو لای ئەمریکا و ئەوروپا داکۆکیان لە رەوایی داواکانی پکک بکردایا. لەبیرمە چۆن پێرەمێردێکی کوردی باکور پێی گوتم ” بەر لە بونی پکک من نەمدەتوانی بڵێم کورد و کرمانجم”.
５- یەپەگە لە رۆژئاوا روداوی گرنگی نیشتمانی و نەتەوەیی دروست کردوە، شەڕڤانانی کوڕ و کچ سەری هەموانیان بەرز کردوە، دەبو دەسەڵاتدارانی باشور هاوشێوەی شەقامی شارەکانی باشور پشتیوانیان بکردبایان.
بە کورتی، تائێرە رونە کە ئەم دەسەڵاتە حیزبیە نەک هەر فەشەلی هاوردوە لە:
１- پرسی نەتەوە و نیشتمان
２- حوکمڕانی و خزمەتگوزاری
بەڵکە زیانی گەورەی بە بزوتنەوەی نیشتمانی کوردستان گەیاندوە، بەردەوامیشیان لە دەسەڵات ئەم بزوتنەوەیە توشی نسکۆی گەورەتر لە وانەی رابردو دەکەن. بۆیە ئەگەر میللەت دەیەوێ:
１- پرسی نیشتمانەکەی چارەسەر بکرێت.
２- ئازاد و خۆشگوزەران و شەرەفمەندانە بژێت.
دەبێ بە ئاگا بێتەوە و هەنگاو بەرەو دروستکردنی بومەلەرزەیەکی سیاسی سەرتاسەری بنێت، بومەلەرزەیەک بتوانێت:
１- هەمو ئەوانیتر تێپەڕێنێت و تەواوی کوردستان بکا بەیەک گۆڕەپان.
２- حیزب وسەرکردە و بنەماڵە راچڵەکێنێ و بیانگەڕێنێتەوە ژیانی ئاسایی ناو کۆمەڵگە.
３- گرد و یاڵ و پێدەشت و چەک بکاتەوە بە موڵکی گشتی.