ستاندەر
مایلز کاگینز وتەبێژی هاوپەیمانی نێودەوڵەتی بە ناو دژ بە داعش ڕایدەگەیەنێت: ئەمریکا 5200 سەربازی خۆی لە عێراقدا دەهێڵێتەوە و هەزاران ڕاوێژکار و ڕاهێنەرانی سەربازی هاوپەیمانانیش لەم وڵاتەدا دەمێننەوە.
وتەبێژی هاوپەیمانی نێودەوڵەتی بە سەرکردایەتی ئەمریکا لە عێراق ڕایگەیاند کە گۆڕانکاری لە بنکە سەربازییەکان هیچ پەیوەندییەکی بە هێرشە ڕۆکێتییەکانی ئەم دواییە نییە و ئەمریکا سەربازی خۆی لە عێراقدا دەهێڵێتەوە.
ناوبراو لە دیدارێکی لەگەڵ شەرقولئەوسەت ڕایگەیاندووە ڕادەستکردنی بنکە سەربازییەکان بە هێزەکانی عێراق پلانێکی هاوبەش بووە و هیچ پەیوەندیی بە بڵاوبوونەوەی ڤایرۆسی کرۆنا و هێرشە ڕۆکێتییەکان نەبووە.
دەشڵێت بەشێک لە هێزەکانی ئەمریکا لە چەندین بنکەی سەربازی دیکە لە عێراق جێگیر دەکرێن و ژمارەیەکی دیکەش بۆ وڵاتی کوێت و ئەمریکا دەگوازرێنەوە.