ستاندەر
رێبوار كەریم وەلی، رۆژنامەنووس لە دامەزراوەی ڕووداو كە بەوە ناسراوە نزیكە لە نێچیرڤان بارزانی سەرۆكی هەرێم، رەخنە لە ئیدارەی ئێستای هەرێم دەگرێت و دەلێت بەرەو ئیدارەیەكی ئەمنی رۆیشتووە.
ناوبراو لە وتارێك كە لە ڕووداو بڵاویكردۆتەوە نوسیویەتی:”ئیدارە و سیاسەتی کوردستان، بەدەر لە قەیرانیش خەریکە تەحویل دەبێ بە ئیدارە و سیاسەتێکی ئەمنی. لە زۆرشتیشدا حکومەت ھێزی بازووی خۆی تاقیدەکاتەوە. بۆ سەلماندنی ئەوەی کە حکومەتێکی بەھێزە”. دەشلێت:” ئاماژە سیاسی و ئابوورییەکانی ناوخۆی کوردستان دڵخۆشکەر نین و رەنگبێ کۆنترۆڵکردن و راگرتنی ئەو وەزعە تەنانەت دوای رەوینەوەی پەتاکەش ھێندە ئاسان نەبێ. بۆیە رۆژانی سەختمان لە پێشە”.
رێبوار كەریم وەلی نوسیویەتیشی:” راستە کە توانای دارایی حکومەت سنووردارە، بەڵام ھەر ئەوەندەی کە ھەشە ئەگەر بە عادیلانە بەسەر خەڵکدا دابەش بکرێت بەش دەکات. حوکمڕانی مانای بەرپرسیاریێتییە لە سەروماڵی خەڵک و حکومەت دەبێ ئەو متمانەیە بۆ خەڵک بگێڕێتەوە. راستگۆیی لەگەڵ خەڵک و شەفافییەت، زامنی ھێنانەدیی ئەرک و بەرپرسیاریێتییە”.