ستاندەر
كۆبونەوەكانی وەفدی هەرێمی كوردستان بە سەرۆكایەتی قوباد تالەبانی ئەمرۆ چوارشەممە لە بەغدا دەستی پێكردووە بۆ چارەسەركردنی كێشەی نەناردنی بەشە مووچەی فەرمانبەرانی هەرێم.
لەوچوارچێوەیە هودا سەجاد ئەندامی ئەنجومەنی نوێنەرانی عێراق لە هاوپەیمانی نەسر رایدەگەیەنێت نابێت وەفدی عێراقی بۆ گفتوگۆكان بەسەرۆكایەتی سامر غەزبان هیچ بەلێنێك بە وەفدی هەرێم بدات كە بەرپرسیاریەتی دارایی بخاتە سەر حكومەتی نوێی عێراق.
وتیشی پێویستە حكومەتی هەرێم داهاتی فرۆشتنی نەوتی ساڵی 2019 بەگوێرەی یاسای بودجە و داهاتی ساڵانی پێشووش ئەوەی پەیوەندیدارە بە نەوت بگەرێنێتەوە خەزێنەی حكومەتی ناوەندی، هەروەها پێویستە لێكۆلینەوە لەو 128 ملیار دۆلارە بكرێت كە دەستەی نەزاهەی عێراق رایگەیاندووە لە هەرێم بەهەدەر دراوە. هاوكات حكومەتی هەرێم ئەو 4 ملیار دۆلارەش بگەرێنێتەوە كە تایبەت بوە بە بانكی بازرگانی عێراقی.
ئەو پەرلەمانتارە داوای رێكخستنەوەی خاڵە سنوریەكانی هەرێم و بەستنەوەی بە بەغدا دەكات و گەرانەوەی داهاتەكانیان بۆ بەغدا.
جێی باسە بەهۆی فشارەكانی سەر حكومەتی كاربەكرێكەری بەغدا و پابەند نەبونەكانی حكومەتی هەرێم تاكوئێستا مووچەی فەرامانبەرانی هەرێم لەلایەن بەغداوە نەنێردراوە.