ستاندەر
نێردەی نەتەوە یەكگرتووەكان بۆ عێراق لەبارەی كێشەی نێوان هەرێم و بەغدا پرۆژەیەكی لەژێر ناونیشانی نەخشەرێگای چارەسەركردنی گشتگیر بۆ كێشەكانی نێوان هەرێم و بەغدا، ئامادەكردووە، كە تیایدا كاركردن بە سیستمی كۆنفیدراڵی لەعێراق بەچارەسەری كێشەكان داناوە، بۆ ئەوەش جەنین هینیس بلاسخارت نێردەی نەتەوەیەكگرتوەكان لەگەڵ بەرپرسانی عێراق و هەرێمی كوردستان كۆبووەتەوەو پرۆژەكەی لەگەڵ سەرۆك كۆمار و حكومەتی عێراقی و بەرپرسانی هەرێمی تاوتوێ كردووە.
بەگوێرەی راپۆرتێكی شەفەق نیوز نێردەی نەتەوە یەكگرتووەكان بۆ هاوكاریكردنی عێراق (یۆنامی) لەسەر پلانەكەی بۆ چارەسەركردنی كێشەكانی نێوان هەرێم و بەغداو پەیڕەوكردنی سیستمی كۆنفیرداڵی، رایگەیاندووە: دەبێ هەردوولا لەسەر بنەمای دەستوری عێراق بگەنە رێككەوتن.
نێردەی نەتەوە یەكگرتووەكان لە عێراق، لەوەڵامی ئەو راپۆرتەی شەفەق نیوز رایگەیاندووە، ئەوان هانی هەرێم و بەغدا دەدەن بۆ گەیشتن بە رێككەوتنێكی گشتگیر لەپێناو چارەسەركردنی سەرجەم كێشەكانی نێوانیان لەسەر بنەمای دەستوورو بنەما یاساییەكان.
جەختی لەوەشكردووەتەوە، نەتەوە یەكگرتووەكان لەگەڵ پاراستنی سەربەخۆیی و یەكپارچەیی خاكی عێراقدایە، لەو چوارچێوەیەشدا ئامادەیە هەموو هاوكارییەك پێشكەش بكات.
شەفەق نیوز نوسیویەتی ئەو پێشنیارە دوای ئەو دەستدێرژیانەی توركیا لە ناوچە سنوریەكانی هەرێم و موسل دێت، هەروەها شكستی گفتوگۆكانی نێوان هەرێم و بەغدا بۆ رێكەوتن.