ستاندهر
لەدوای ئەو ڕوداوانەی کە لە خۆپیشاندانەکانی شاری ڕانیە ڕویاندا کە لەئەنجامدا بووە ھۆی شەھیدبونی ٦ خۆپیشاندەر و برینداربونی ٨۰ ھاوڵاتی تر بەدەستی ھێزە ئەمنیەکان، ئەو ڕوداوە کاردانەوەی بەدوای خۆیدا ھێنا.
لەو چوارچێوەیەدا پۆلێک لە پێشمەرگەو ئاسایش و فەرماندەکانی ھێزی پێشمەرگە پشتیوانی خۆیان بۆ خۆپیشاندان دەربڕی و پاڵپشتیان لە داوا ڕەواکانی خۆپیشاندەران دوپات کردەوە.
پیرۆت نەبی فەرماندەی ھێزەکانی پێشمەرگە لە میحوەری دوزخورماتوو، لەڕونکردنەوەیەکدا جەخت لە پاڵپشتی داخوازیە ڕەواکانی خۆپیشاندەران دەکاتەوە، لە ڕونکردنەوەکەدا ھاتووە دەڵێت “من نەک ئێستا، بەڵکوو زۆر پێش ئێستاش وتوومە کە ھەمیشە لە بەرەی خەڵکی بەشخوراوی کوردستانم و وەک ھەموو خەڵک داوای چاکسازی و ژیانیکی شایستە بۆ ھاونیشتیمانیانی کوردستان دەکەم”.
دەشڵێت “من ھەموو تەمەنم چەکم بۆ بەرگری لە خاک و نیشتیمان و دژی داگیرکەرانی کوردستان ھەڵگرتووە و ھەرگیز چەک لە دژی گەلی خۆم و خەڵکی بەشخوراو ھەڵناگرم کە داخوازی مافە ڕەوایەکانی خۆیان دەکەن”.
ھەر پەیوەست بەوە کۆمەڵێک لە پێشمەرگە و ھێزی ئاسایش لەتۆڕی کۆمەڵایەتی فەیسبووک ھەستاون بە بەڵاوکردنەوەی وێنەکانیان و پشتیوانی خۆیان بۆ داوا ڕەواکانی خۆپیشاندەران دەربڕیوە یەکێک لەوانە نوسیویەتی ” ١٠٠ساڵ خۆپیشاندان بەردەوام بێت ئامادەنیم یەک دەقە ڕوی چەک بکەمە خەڵکی برسی و بێ موچەو ھەژار و نەدار، ھەق بە خەڵکی برسییە نەک خاوەن تەنکەر و نەوتو مەسفاکان”.
یەکێکی تر نوسیویەتی “من وەک پێشمەرگەیەک ئەگەر ھەرچی بارەگای حزب ھەیە تەفرو تونا بکرێت ئامادەنیم لولەی چەکەکەم لەھیچ گەنجێکی خێرلەخۆ نەدیوی ئەو وڵاتە بدەم. من خزمەتکاری خەڵکم”
ههروهها یهكێكی تر نوسیویهتی “سوێد بەخوا ھەرچی دەسەڵات و سەروەتی دنیا ھەیە لەسەرم تاپۆکەی ئامادەنیم ئەو تفەنگەی کە بۆ خزمەتکردنی خەڵکی ڕەشو ڕوتی کوردستان لەشانمکردووە ڕووی بکەمە ھاونیشتیمانی خێرلەخۆنەدیوەکەم من ھەمیشە خزمەتکاری ئێوەم ئەرکی من پاراستنی سەروماڵی ئێوەیە”
یەکێکی تر کە ئەفسەرە لەوەزارەتی ناوخۆ نوسیویەتی “من وەک ئەفسەرێکی وەزارەتی ناوخۆ ھەرچی بارەگای حیزبی ھەیە تەفرو تونا بکرێ ئامادەنیم لولەی تفنگەکەم رووبکەم گەنجێکی وڵاتەکەم، بەشانازیەوە ئەیڵێم من خزمەتکاری خەڵکم”.
وێنهی ههڵوێستی كۆمهڵێك له ئهفسهر و پێشمهرگهو ئاسایشی ناوخۆ
