ماڵئاوا ساڵی شكست‌و ناخۆشی

لەلایەن ستاندار Posted on 419 جار بینراوە

هیوا سەید سەلیم

میللەتان لە بەڕێكردنی ساڵ و چوونە ناو دەستپێكی ساڵی نوێ جۆرەها رێورەسمی كۆمەڵایەتی و ئاینی ئاهەنگ ئامێزیان هەیە و بەخۆشیەوە شانازی بە ڕابردوویانەوە دەكەن و بە ئومێدەوە دەڕواننە سالی تازە، هەر تاكێكیش لە كۆمەڵگاكانی بەختەوەر بۆ ساڵی تازەی هیوای گەورەی دەبێت و كۆششی بۆ دەكات تا ئەو هیوا و ئومێدەی بێتە دی كە لە ساڵانی ڕابردوو پێینەگەیشتووە.
لە وڵاتی نێوان دوو زێ ئاشووریەكان و بابلیەكان كە دوو ئیمبراتۆریەی رەسەنی وڵاتی رافدێن بوون لە كۆندا ئەوان یەكی نیسانیان وەك سەری ساڵی خۆیان دەناسی ئەو بۆنەیەش لای ئەوان دەگەڕایەوە بۆ ئ ستۆڕەیەكی خەیاڵی كە بریتی بوو لە زەماوەندی دوو خواوەند كە وەچەی لێكەوتۆتەوە، بەڵام بۆنەی سەری ساڵ لە ئاینەكانی مەسیحی و موسڵمان دوو بۆنەی جیاوازن كە پەیوەست كراون بە پێغەمبەرەكان بۆیەشە یادكردنەوەی جیاوازی بۆدەكەن یەكەم بە ئاهەنگ و خۆشی و دووەمیش بە ئەنجامدانی رێوڕەسمی ئاینی، میللەتی كوردیش سەری ساڵی خۆی هەیە كە بە تەنیا هی كورد نیە بگرە گەلانی ئێرانیش نەورۆز بەسەری ساڵی خۆیان دەزانن و یادی دەكەنەوە، ئەو گیرانەوە مێژوویەمان بۆ ئەوەیە كە بزانین بەڕێكردنی ساڵ هەر تەنها بۆنەیەكی ئاسایی نیە لە لای میللەتان بگرە لە ئێستاشدا هەر وڵات و میللەتێك بە شێوازی تایبەتی خۆی ئەو مەراسیمە سازدەكات.
لێرەدا مەبەسەتمان بڵێین ئێمەی كورد چ ساڵێكمان بەرێكرد و لە پێشوازی چ جۆرە ساڵێكین، لە خۆشمان بپرسین ئەرێ كاتی ئەوە نەهاتووە ئیتر نەڵێین ساڵ بە ساڵ خۆزگەمان بە پار؟
لە كوردستان بە تایبەت لە بەشە باشووریەكەی ساڵ نیە ئێمە نەلێن ( ئەمساڵیشمان ساڵێك بوو پر لە ناخۆشی و نەهامەتی ئومێد دەكەین كە ساڵی داهاتوومان وانەبێی بگرە ساڵی هاتنەدی سەرجەم هیواو ئاواتەكانی گەلەكەمان و تاكەكانی كۆمەڵگا بێت.
بەڵام كە ساڵ تەواو دەبێت و رۆژمێری رۆژانی ڕابردوو هەڵدەدەینەوە ئەوسا تێدەگەین كە هەمدیسان ساڵێكی سەختمان بەرێكردووە و رێك ئەگەر وەك ساڵی پێشتر نەبووبێت ئەوا خرابتر بووە.
لە ئێستاشدا كە ساڵی 2017 بەڕێدەكەین و دەچینە ناوساڵی تازە ئەگەر چاوێك بەو 12 مانگە دابخشێنینەوە تێدەگەین كە چ ساڵێكمان بەرێكردووە، ساڵێك پڕاوپڕ لە قەیران، ساڵێك كە لەرووی سیاسیەوە گەورەترین شكست و پاشەكشەی بۆ كوردی تێدابوو، شكستێك كە دەیان ساڵ پرسی كوردی گێڕایەوە دواوە، ساڵێك كە لە ئاستی ژیان و گوزەرانی خەڵكدا زۆر كارەساتبار بوو.
بۆیە ئەگەر لە ساڵی داهاتوو بەو ساڵە بووترێت (خۆزگەمان بە پار) واتا دەبێت گۆڕ بۆخۆمان هەڵكەنین، چونكە ئەوەی لە ئەمساڵدا بینیمان و میللەت بەرگەی گرت زۆر ئاستەمە ساڵی داهاتووە بەرگەی بگرێت.

 
كەوایە ئێمەی كورد دیسان بێبەشین لەو قسەیەی كە میللەتان لە دوا ساتەكانی سەری ساڵ دەیڵێنەوە و خۆشیەكانیان بە ووتنەوەی (هەموو ساڵێ بەخۆشی) بەڕێدەكەن.
پرسیارەكە لێردایە تاكەی كورد پێچەوانەی میللەتان لەشوێنی هەموو ساڵێك بەخۆشی تێكڕای ساڵەكە بەنەخۆشی بەڕێبكات، ئایا كێ هەیە ئۆباڵی ئەو ناخۆشیانە لە ئەستۆ بگرێت؟
دەسەڵات یان میللەت، كە ئێمە پێمان وایە هەردووكیان لەوبارەیەوە ئۆباڵەكەی لە ئەستۆیە دەسەلاتی خراب بەشێك لە میللەت پارێزگاری لێدەكات و هۆكاری مانەوەیەتی
دەڵێن یابانیەكان لە شەوی سەری ساڵدا ماڵەكانیان پڕدەكەن لە گوڵ و بۆنی خۆش و لە قاقای پێكەنین دەدەن تا گیانە توند و ناخۆشەكان لە ناویان باربكات، ئێمەی دەبێت لە خۆمان بپرسین چی بكەیان تا ئەو نەهامەتیە لە ناومان نەمێنێت و ئەو دێوەزمەی باڵی بەسەر خەڵكی كوردستاندا گرتوە و هۆكاری ناخۆشی و شكست و نەهامەتیەكانمان لە خۆمانی دوورخەینەوە .
وەڵامی ئەو پرسیارە وەرنەگرینەوە ئەمساڵیش دە

ڕوات و سالی داهاتووش باشتر نابێت لەو ساڵە، ئەوسا با هەر بۆخۆمان بڵێین ساڵ بەساڵ خۆزگەمان بە پار.

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.