:کەمال ئەسکەندەر
مانگی سێ بۆ کوردانی باشور ، مانگێکی پر لە یادەوەری ئازار بەخشە بەمانای کەلیمە ناو و ناوەڕۆکەکەی بۆ گەلی کورد یەک مانای ھەیە ، بەڵام لەگەڵ ئەوەش دا ڕاپەڕینی شارو شارۆچکەکان بەبەشداری ھێزی شاخ و ھاواری شار دڵخۆشکەر بون چونکە دژ بەڕژێمێکی ستەمکار بوو کەھەموو پێناسەیەکی خراپ شایستەی حکومڕانی ئەوان بوو بەتایبەت لەبەرامبەر ئێمەی کورد و عەرەبی شیعە .
میللەتێک لە چەند دەیەی پێش ڕاپەڕینی ساڵی نەوەدویەک داشی دامەی دەستی ئاغاو جاشەکان بوبێت ، میللەتێک ئەوسا داشێکی خوراوی نێوان بەعس و شۆڕش بوبێت ڕۆژێک بەئەنفال و ڕۆژێک بە کیمیا باران و ڕۆژێکیش بە ڕاگواستن ،ئیتر ڕووداو وپێشھاتە تراژیدیاکانی پسانەوەی نەبوبێت، بێنە بەرچاوت دەبێ لە چ ژیانێک شەو وڕۆژەکانی تێپەڕ کردبێت .
خۆشبەختانە جامی میللەت وشۆڕش لەسەری ڕژا و ڕاپەڕینەکانی لێ پەیدابوو ، ئاھێک بەبەر دڵی میللەت داھات ،ئومێدی خۆشگوزەرانیەکان لە دڵی ھەر تاکێکی کورد چەکەرەی کرد ، برینی سەر دڵی کەس وکاری ئەنفال گۆڕا بە زەردەخەنەی سەر ڕوخسار ، فرمێسکی چاوی دایکانی شەھیدان بو بەفرمێسکی ھیوا وئومێدی داھاتوو ، ساڵ لەدوای ساڵ لەگەڵ ھاتنی یادەکانی ڕاپەڕین دا ھەڵپەڕین نمایش دەکرا ، بەڵام داخەکەم میللەت نەیزانی بەڕزگار بونی لە داشی یاریچیەکان ڕووبەڕووی فیلمێکی تر دەبێتەوە ، نەیزانی پاڵەوانانی فیلمەکان دەبن بە ئاش و میللەت وەکو باراش بۆ قەڵەوبونی خۆیان دەھاڕن .
نەیانزانی ڕابردوو دەبێت بە دووبارەی شریتی سەروەریەکان لای بەرپرسان بۆ دەسگرتن بەسەر پلەو پۆست وداھات و ئیمتیازاتی حکومەتە ساوایەکەی ھەرێم وحزب .
نەیانزانی شۆڕش دەبێت بەتاکە شەرعیەتی خۆدەوڵەمەندکردن و حساب نەکردن بۆ جیلی دوای شۆڕش . نەیانزانی ھەمان تاسە تەنھا گەرماوەکەی کەمێک لەوەی تر سارد تر دەبێت.
ئیتر نەیانزانی قۆناغی داش بونیان تێپەڕاند بەڵام ھەنگاوی بەرەو ھاڕینیان بەوێنەی باراش بۆ خۆراکی نوخبەیەکی سیاسی دەبێت.