دانا مەنمی
بەتێپەڕبوونی کات ھەنگاونان بۆ ئایندەی ژیان یەکێک لەگرنگترین ئەرکە فیکرییەکانی ڕۆشنبیرانی ڕاستگۆو ڕاشکاو لەناو پارتیدا ڕاوەستانێکی ڕەخنەییە لەبەردەم پێکھیێنانی کابینەی نۆیەمی حکومەتی ھەرێم و حوکمی بنەماڵەیی بارزانیدا کە ڕووداو حیکایەتەکانی کابینەی ھەشتەم ھێندە شکستخواردوو شەرمنانەیە مرۆڤ شەرم دەکات بەفەخرەوە گەشبین بێت بۆ کابینەی نۆیەم و پیرۆزباییان لێبکات، ئێستاش بە شەرمەوە حیکایەتەکانی کابینەی ھەشتەم و حوکمی سەرۆکی ھەرێم و حکومەتێکی شکستخواردوو دەگێردرێتەوە کە بەھۆی ئابوری سەربەخۆو ڕیفراندۆمەوە خەڵکی کوردستانیان بەرەو تونێلێکی نادیارو مەترسیدار برد ،خەڵکی کوردستان لە خراپترین ھەلومەرجی ژیاندا گوزەران بەسەر دەبەن ، ھێرشێکی فراوانی برسیکردن و ھەژارکردنیان لەلایەن پارتی و حکومەتەکەیەوە پەیڕەو دەکرێت .
تەحەدای گەورەی مێژووی ھەر ھاوڵاتییەک لەکوردستان ڕزگاربوونە لەو مێژووەی کە پارتی لەسیاسەتدا بەرھەمی دەھێنێنتەوەو کابینە دوای کابینە شکست دوای شکست لەپێش کۆمەڵگادا قووتی دەکاتەوە ، ھێشتا قەیرانگەلێکمان لەکابینەی ھەشتەم بۆماوەتەوە کە بەشێکە لە ئایندەمان و بەرەو ڕووی دەچین و کابینەیەک نییە تێپەڕابێت ، ئەم مێژووە کە پارتی بنیاتی دەنێت نوقمە لە کێشەو ناکۆکی و شکست و ھەڵھاتن و بچوکتر لەشوناسی نەتەوەیی بیر لە بەھێزکردنی شوناسی ناوچەیی و خێڵچێتی و بنەماڵەی دەکرێتەوە ، مەسعود بارزانی لە پشتی پارتییەوە دەیەوێت ووردە ووردە شوێنی نەتەوە بە بنەماڵە پڕ بکاتەوە ، ئیدی حوکمی بنەماڵە بەدەزگای بکرێت و ببێتە بناغەی سیاسەت و ڕێکخستنی کۆمەڵگاو قسەو وێنە و خەیاڵی پاشاو شازادەی نەوە دوا نەوەی بنەماڵە بڵێینەوە !
مەسعود بارزانی وەکو مەرجەعێک لە ناو پارتیدا نەیتوانیووە قۆناغی ڕاپەڕین و خەون و خەیاڵی حیزب و بنەماڵە بگوازێتەوە بۆ قۆناغی قەڵەم و موراجەعات ! وە نەیشیتوانیووە ئامادەگی ھوشیاری نەتەوەیی بەسەر گروھو ئایدۆلۆژیاو دیدی ناتەباو ناکۆکدا دابەشبکات بۆ تێپەڕاندن لە چوارچێوەی خێڵ و بنەماڵە ، ئەوەی لە خەیاڵدانی مەسعود بارزانی و حیزبەکەیدا وونە چوارچێوەی نەتەوەییە کە بەناوو بەرگی نەتەوەییەوە خەیاڵی خێڵ و بنەماڵە پتەو دەکەن و لە بەرگێکی نەتەوەیدا پێمان دەفرۆشنەوە،مەسعود بارزانی و حیزبەکەی لەڕیفراندۆم دا بەمانا سیاسییەکەی نەک دەوڵەتی بۆ دروست نەکرا بەڵکو بناغەکانی دروستبوونی دەوڵەت و نەتەوەو شوناسی نەتەوەیشیان لاواز کرد ، لە دوای ڕیفراندۆمەوە کورد لەھەموو کات پارچە پارچەترەو لەغیابی ستراتیژی نەتەوەیی و چوارچێوەی یەکڕیزیدا دەژی .
پارتی وەکو حیزبێکی بنەماڵەی ھەڵگری توخم و ڕەگەزو سیستەمی خێڵایەتییەو ھەمیشە بە شوێن ئەوەوە بووە کە ھەندێک کاراکتەری ماڵباتی بارزانی بکاتە پاڵەوانی فریادرەس و ڕزگاریکەری کۆمەڵگای کوردی ، لەکاتێکدا ئەم پاڵەوانانە بوونەتە مایەی کارەسات و بە ھۆی سیاسەتی بەرژەوەندیخوازو کورت بینیانەوە بێ ئومێدی لای خەڵک دروست کردووە ، پارتی لەلایەک لەناو وەھمی دروستکردنی پاڵەواندایە و لەلایەکی تر وەک حیزبێکی بورژوازی داھاتی خەلک و سامانی گشتی تاڵان دەکات ،ئازادییەکان لە ژێر پێ دەنێت و کادیرانی خۆی و فەرمانبەرانی ھەرێمی خستووەتە ژێر باری قەرزێکی زۆرەوە و قەرزاری کردوون بۆ ئەوەی ببنە پاشکۆو کۆیلەو ژێر دەستەی حیزب و بنەماڵە .