یەكەم كاردانەوەی سیاسی دژ بە دەستدرێژیەكانی توركیا لە هەرێمی كوردستان

لەلایەن ستاندار Posted on 366 جار بینراوە

ستاندەر

سێ حیزبی باشووری كوردستان لە راگەیەنراوێك ئیدانەی تۆپاران كردنی ناوچە جیاجیاكانی هەرێمی كوردستان دەكەن.

 

لە راگەیەنراوێكی هاوبەشدا هەریەك لە حیزبەكانی زەحمەتكێشانی كوردستان و حیزبی شیوعی  كوردستان و بزوتنەوەى دیموکراتى گەلى کوردستان رایانگەیاندووە  “بۆردومان کردنى باشووری کوردستان بەشێکە لە سیاسیەتى شەڕانخوازى ئۆردوگان و دەبێت  هێزە سیاسیەکانی باشور بە هەڵویستێکى یەکگرتووى نیشتمانى ڕووبەڕووی ببنەوە و دووپاتى دەکەینەوە کە چارەسەرى مەسەلەى رەواى گەلى کوردستان لە باکوور بە بۆردومان کردنى شنگال و قەندیل و مخموور ناکرێت”.
تەوای راگەیەندراوەکەی لێژنەى هاوبەشى چەپى کوردستانى:

بۆردومان کردنى کوردستانى باشوور بەشێکە لە سیاسیەتى شەڕانخوازى ئۆردوگان لە رۆژهەڵاتى ناوەراست و باشوورى ئەفریقیا،شەوى 14 لەسەر 15ى حوزیران دیسانەوە فرۆکە جەنگیەکانى تورکیا شاڵاوێکى دڕندانەیان دژ بە کۆمەڵێک ناوچەى کوردستانى باشوور بەرپاکرد ، لەوانە شنگال و چیاى قەندیل و کەمپی مخمور وەک بەردەوامبونێکى سیاسەتى شەڕەنخوازى کەنەک تەنها لە باشووردا بەرپاى دەکات ، بەڵکو لە رۆژئاوا و لە سوریادا بەدزێوترین شیواز ئەنجامى دەدات بە جۆرێک کار بۆ ئەنجامدانى گۆرانکارى دیموگرافی دەکات وەک ئەوەى لەشارى (عەفرین)دا روویداوە ، و جگە لە گۆڕینى دراوى سورى بەدراوى تورکى لەو ناوچانەى کە بە بەکرێگیراو تەنیویتى و ئێستاش بە لێشاو ئەو چەکدارانەى ئێرە و داعش بۆ لیبیا دەگوێزێتەوە کە ئەمەش هەڕەشەیەکى مەترسیدارە لە ئاشتى و ئاسایشى دەریاى ناوەڕاست و ئاسایشى فەرنسا و ئیتاڵیا و یۆنان و قوبرس جگە لەوەى ئاسایشى میسروتونس دەخاتە بەر مەترسییەوە .
بۆردومان کردنى بەردەوامى کوردستانى باشور جگە لەوەى بە پێشێل کردنى یاساى نێودەوڵەتى دادەنرێت بەشێکە لەو نەخشەیەى کە ئۆردوگان و حزبەکەى دەیانەوێ وەک پۆلیسى ناوچەکە بیبینن ، و وەک کارتێکى کاریگەرى هەرێمایەتى لەناوچەى رۆژهەڵاتى ناوەڕاست بۆ کۆمەڵگاى نێودەوڵەتى خۆیان نمایش دەکەن .
جگە لەوەى کە بە پێویستى دەزانین هێزە سیاسیەکانى کوردستانى باشوور هەڵویستێکى یەکگرتووى نیشتمانى کوردستانیان سەبارەت بە دەستدرێژیە یەک لەدواى یەکەکانى تورکیا دەربڕن ، پێمان وایە یەکێتى ئەوروپا و نەتەوە یەکگرتوەکان دەبێ هەڵوێستى ئاشکرا سەبارەت بە جموجۆڵەکانى تورکیا لەتەواوى ناوچەکەدا بەتایبەتى باشوور و رۆژئاوا و سوریا و لیبیا ،  وەرگرن و رەفتارەکانى تورکیا کە بۆتە هۆى بارگرژى و مەترسى بەردەوام لەسەر ئاشتى و ئاسایش ، مەحکوم کەن .
لێژنەى کارى هاوبەشى چەپى کوردستانى دوپاتى ئەوە دەکاتەوە کە چارەسەرى مەسەلەى رەواى گەلى کوردستان لە باکوور بە بۆردومان کردنى شنگال و قەندیل و مخمور ناکرێت و ، ئەم بابەتە بە دانوستان و هەڵبژاردنى رێگاى گفتوگۆى شارستانییانە دەبێت کە چارەسەرى ئاشتى عادیلانە بۆ مەسەلەى رەواى گەلەکەمان لە باکوور دابین بکات.

لێژنەى کارى هاوبەشى چەپى کوردستانى:

حزبى زەحمەتکێشانى کوردستان 
حزبى شیوعى کوردستان 
بزوتنەوەى دیموکراتى گەلى کوردستان 

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.