ستاندەر
حەنین قەدۆ، ئەدامی لیژنەی دارایی ئەنجومەنی نوێنەران، بڕیاری مستەفا كازمی بۆ رەوانەكردنی پارە بۆ هەرێمی كوردستان بە سەرپێچیكردنی دەستوورە لە قەڵەم دەكات و پێی وایە رەوانەكردنی ئەو پارەیە لەكاتێكدایە، كە هەرێم لەبارەی داهاتەكانی نەوت و دەروازە سنوورییەكان و فرۆكەخانەكان پابەندی بەڵێنەكانی نەبووە.
ناوبراو ئەوەشی ئاشكراكرد: ئەنجوومەنی نوێنەران هەڵویستی لەسەر ئەو سەرپێچییەی كازمی بۆ دەستووری عێراق دەبێت، هەروەك چۆن سەرۆك وەزیران مافی ئەوەی نییە بەگوێرەی میزاجە سیاسی و ئارەزووە تایبەتییەكانی خۆی مامەڵە بە موڵك و ماڵی عێراقییەكانەوە بكات، بۆ ئەوەش دەبێت پەڕلەمانی عێراق هەڵوێستی توند دژ بەسەرپێچییەكانی حكومەت وەربگرێت.