بزوتنەوەی گۆڕان لەبارەی دەنگۆیەك ڕوونكردنەوەیەكی بڵاوكردەوە

لەلایەن ستاندار Posted on 234 جار بینراوە

ستاندەر

بزووتنەوەی گۆڕان لەروونكردنەوەیەكدا رەتی دەكاتەوە هیچ كۆمپانیایەكی بازرگانیان هەبێت.

لەروونكردنەوەك كە بەناوی وتەبێژی بزوتنەوەكە بڵاوكراوەتەوە هاتووە، ماوەیەكە لێرەو لەوێ، هەندێك لایەن و كەس و ماڵپەڕ، لەچوارچێوەی شەڕی دەروونی دژ بە بزووتنەوەی گۆڕان و گۆڕانخوازان، پڕوپاگەندەو درۆی ژەهراوی بڵاودەكەنەوە، كە گوایە بزووتنەوەی گۆڕان كۆمپانیای بازرگانی هەیەو لە دەروازەكان كار ئەكات.

لەبەشێكی تری روونكردنەوەكە هاتووە  ” ئەو لایەنانە خۆیان رۆژانە سەرقاڵی بەدەستهێنانی نایاساییانەی داهاتن لە دەروازەكان، بۆ پەردەپۆشكردنی ئەو كارە دزێوەو دزیكردن لە داهاتی گشتی و قوتی هاونیشتمانیان، لەرێگەی ئۆرگانەكانیان وەیا ئەو كەسانەی خزاونەتە نێو بازنەی بەرژەوەندیەكانیان، دەیانەوێت بزوتنەوەی گۆڕان وەك خۆیان وێنا بكەن”.

وتەبێژی گۆڕان راشیگەیاندووە، دیارە ئەمە نەیەكەم جار و نە دواجار ئەبێت بۆ خۆڵكردنە چاوی هاونیشتمانیان و گۆڕانخوازان ئەم جۆرە پڕوپاگەندانانە دەكرێن‌و بزووتنەوەی گۆڕان بە پێویستی ئەزانێت ئەم راستیانە بۆ هاونیشتمانیان و گۆڕانخوازان بخاتە روو:
بزووتنەوەی گۆڕان هیچ كۆمپانیایەكی بازرگانی نیە.
بزووتنەوەی گۆڕان هیچ كارێكی بازرگانی لەدەروازەكان و دەرەوەی دەروازەكان ناكات.

ئەوەش هاتووە: “بزووتنەوەی گۆڕان بەئەركی حكومەت و لایەنە پەیوەندیدارەكانی دەزانێت، هەموو ئیجرائاتێكی یاسایی و ئسوڵی پێویست بگرێتە بەر بۆ كۆتایی هێنان بەو كارە نایاسایی و دزی كردنە لە مەرزەكان و قۆرخكاری بازاڕ و برەودان بە كۆمپانیای حزبی.
دروشمی سەرەكی بزوتنەوەی گۆڕان هەر لەسەرەتای دامەزراندنیەوە تا ئێستاو لە ئایندەشدا، دوور خستنەوەی دەستی حزبە لە بازرگانی و قۆرخكاری وكۆنترۆڵ كردنی بازاڕ لەلایەن كەرتی حزبی و كەسایەتیە بەرپرسەكانی حزبەوە. بۆ ئەو ئامانجە خەباتمان كردوەو بەردەوام ئەبین.”

وتەبێژی گۆڕان ئەوەش رادەگەیەنێت، دواجار داوا لە هەمو كەس و لایەنێك ئەكەین، گەر هەر جۆرە زانیاری و دۆكۆمێنتێكی لایە لەسەر بونی كاری بازرگانی بەناوی گۆڕانەوە، پێشكەشی رای گشتی و لایەنی پەیوەندیداری بكەن. بەپێچەوانەوە، قسە فڕێدان بەمەبەستی ناوزڕاندن و تۆمەتهەڵبەستن، بۆ پەردەپۆشكردنی راستیەكان و ون بونی كەیسەكە و تەڕ و وشك پێكەوە سوتاندن، ناچارمان ئەكات پەنا بۆ رێكاری یاسایی ببەین.

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *

ئەم ماڵپەڕە لە ئەکیسمێت بۆ کەمکردنەوەی هەرزە واڵە و سپام سوود دەگڕێ. فێربە چۆن زانیاری بۆچونەکانت ڕێکدەخرێت.